Roskildemi kalaallisut naalagiarput

Oqaluffik taanna, Roskilde Domkirke, Danmarkimi oqaluffinnut annernut ilaavoq, tassanilu kalaallisut naalagiarneq pisunut qaqutigoortunut ilaalluni.

Københavnimi Helligåndskirkemi naalagiat aamma Kalaallit angerlarsimaffianni Brønshøjimiittumi najugallit piumasut Roskildemi oqaluffimmut immikkut angallanneqarnissaat isumagineqarpoq.

- Oqaluffissaarsuarmi naalagiarneq kaffisortitsinerlu misigisaavoq nuannersoq, naalagiat ilaat, Salome Dorph oqarpoq. Taanna tartumigut suliaritikkiartorluni massakkut Danmarkimiippoq.

Inunnik taama amerlatigisunik naalagiartitsinini kalaallit Danmarkimi palasiata Jens Kristian Kleistip alutorsaatigaa.

- Oqaluffik immikkuullarissoq inunnut taama amerlatigisunut naalagartitsiffigalugu misigisaavoq puigunaatsoq, Jens Kristian Kleist oqarpoq.

Erinarsoqatigiit Aavaat Aviaja Lumholtimit siulersorneqarlutik tussiutinik marlunnik atuipput. Naalagiarneq naammassimmat najuuttut kaffillerfigineqarput.

Roskildep oqaluffiani palasiuneq Jens Arendt naalagiarnerup nalaani qallunaatut naatsumik oqaluussivoq. Taassuma aaqqissuussineq naammagisimaarpaa, aamma oqaluffimmi tassani siunissami kalaallisut naalagiartoqaqqinnissaa piareersimaffigalugu oqaatigaa.

Naalagiarneq nerliiviliarnertalik Roskildemi Kalaallit Nunaat pillugu sammisassaqartitsinermi  "Inuit Nu"-mi, aaqqissuussinernut ilaavoq.