Rosine Karlsen angerlarsimaffeqanngitsuuvoq: Kalaaleqatini angerlarsimaffeeruttut ikiorai

Kalaallit Danmarkimi angerlarsimaffeqanngitsut arlalitsigut suliniuteqarnikkut ikiorneqassapput. Rosine Karlsen angerlarsimaffeqanngitsut nuna tamakkerlugu kattuffianni, SAND-imi suleqataavoq, sullissinermilu angerlarsimaffeqanngitsunut ikorfartortaasarpoq.

Allattoq Ann-Sophie Greve Møller

februaarip 26-at 2024 11:52

Nutserisoq Nathan Kreutzmann

Rosine Karlsen meeqqanilu marluk Nuummiit Danmarkimut 2005-mi nuupput, nooqqaaramillu inuunerat ajunngitsumik aallartippoq.

Nuummiuunerup ilaquttallu qimanneri tassunga imaannaanngilaq, Københavnimili inissaminik tunilertorneqarpoq.

Kinguninnguali pissutsit allanngoriartulerput.

Rosine Karlsenip Danmarkimi sullisseriaaseq paasiuminaatsissimavaa, akiligassallu amerligaluttuinnarput.

- Sullisseriaaseq ilisimanngikkaanni ilungersunartorujussuusarpoq. MitID taamani suli atuutilinngilaq, taamaattumik akiligassat akileraarutinut allanullu tunngasut isumaginiarneri ajornakusooqaaq. Akiligassallu erniaqartarmata akiliinngitsoornarsisarpoq, Rosine Karlsen KNR-ip angerlarsimaffeqanngitsut nuna tamakkerlugu kattuffiannut, SAND-imut pulaarnerani oqarpoq.

Aamma atuarukDanmark: Inatsisilerituut Kalaallit immikkut ikiortariallit ikiorusuppaat

Rosine Karlsen 46-nik ukioqartoq Københavnimi maanna angerlarsimaffeqanngilaq. Ukiut arfinillit matuma siorna ajornartorsiornermini angerlarsimaffeeruppoq, kommunimiillu ikiorneqarluni angerlarsimaffittaaqqinniarnera suli piviusunngunngilaq.

Københavnimilu inissarsiniarlutik utaqqisorparujussuit akornanni tullinnguunnissaminut utaqqinermini angerlarsimaffeqanngitsut unnuisarfianni maanna sinittarpoq.

- Naqqaniit maanna aallartippunga inissarsinissaralu utaqqivara, taanna oqarpoq.

Angerlarsimaffeqanngitsut ikiorai

Kalaallit inuuniarnikkut ajornartorsiutillit Danmarkimut nuuttartut oqartussanit nalunaarsorneqarneq ajormata qasserpiaanerat ilisimaneqanngilaq.

Isumaginninnermut tunngasunik sullissinermi kikkut kalaaliunersut nalunaarsorneqarneq ajornerat tamatumunnga pissutaavoq.

Rosine Karlsenili nunatsinniit Danmarkimut nuuttartut amerlasuut angerlarsimffeeruttartut ilagiinnarpaat.

Kalaallit Danmarkimi innuuttaasut unnuisarfinniittarnissaannik oqartussanit neqerooruteqarfigineqartartut ukiuni kingullerni amerleriangaatsiarsimasut angerlarsimaffeqanngitsuunermik ilisimatusartoq Ilisimatusarfimmilu Issittumi Atugarissaarnermik Ilisimatusarfimmi aqutsisoq, Steven Arnfjord oqarpoq.

KALAALLINUT DANMARKIMIITTUNUT INATSISITIGUT UNAMMILLERNARSINNAASUT

Inuit Kalaallit Nunaanniit Danmarkimut nuuttut pillugit, danskit oqartussaasuisa pappiaqqanik paasissutissanik piniarnerat, qaammaterpassuarnik sivisussuseqarsinnaavoq. Taamaalilluni ikiorsiissutinik sullinneqarnissamillu piniarneq ajornakusuulersinnaavoq.
Ajornartorsiut alla tassaasinnaavoq, oqartussanit suliassanngortinneqartut pillugit, oqalutsimik nutserisumilluunnit qulakkeerunneqarsinnaannginneq. Tamanna paatsooqatigiinnermik kinguneqartitsisinnaavoq, assersuutigalugu oqartussat sulianut aalajangiinerinut paasinninngitsoortoqarsinnaavoq. Ajornartorsiutillu ilagivaat kalaallit meerartaannik arsarinninnissamik suliat aallartinneqaraangata.
Innuttaasut kalaallit Danmarkimi inissarsiulernermi ajornartorsiorsinnaapput. Assersuutigineqarsinnaavoq, kommunemiit piumasaqaatinik angusaqanngitsoorneq, pissutigalugu sullinneqartoq nunatsinnut attuumassuteqarnerusutut nalilerneqarsinnaammat.Ikiorneqarnissarlu killeqarmat angerlarsimaffeqanngitsut ornittagaannut pisariaqartarsinnaallutik.
Justitap 2023-imi nalunaarusiami innersuussinera malillugu, inissamik neqeroortarneq, kalaallinut nunatsinnit Danmarkimut nuuttunut atuutinneqassanngilaq.
Atassuteqarnermut piumasaqaat tassaavoq, Danmarkimut atassuteqarneq imaluunnit attuumassuteqarneq, nunangisamut attuumassuteqarnermiit annertunerusussaassaaq.
2023-imiit kalaallit nunatsinni inunngorsimasut, inuit 17.000-it Danmarkimi najugaqartut nalunaarsorneqarsimapput.

Najoqqutat: Stenbroens Jurister, Nunatsinni naatsorsueqqissaartarfik, FN-ip nunap inoqqaavisa pisinnaatitaaffii pillugit immikkut nalunaarusiaa.

Allisiguk

Rosine Karlsenillu tamanna aamma maluginiarpaa.

Taanna angerlarsimaffeqanngitsut nuna tamakkerlugu kattuffianni, SAND-imi ikiuuttunut ilaavoq, kalaallillu Danmarkimut noorlaat angerlarsimaffeeruttut ikorfartortarpai.

- Angerlarsimaffeqanngitsuuneq imaannaanngitsorujussuuvoq. Taamaattumik angerlarsimaffeeruterlaat sullissinerup qanoq ingerlasarneranik nassuiaanniartarpagut.

- Kalaalerpassuit ullut tamaasa naapittarpakka. Ajornartorsiutigullu assigiipajaartarput, taanna oqarpoq.

Nunatsinnit Danmarkimut nuuttartut ajornartorsiutit aqqusaartagaat assigiiffeqartarput.

Kalaallit Danmarkimiittut inuuniarnikkut ajornartorsiutillit inatsisitigut siunnersorneqartarnerannik pitsanngorsaaniarluni suliniummi nutaami inatsileritooq Stenbroens Juristerimeersoq, Sina Parbst Frederiksen siuttuuvoq.

Taassuma isumaginninnermut tunngasunik suliaqartoqartillugu oqalutsinik amigaateqartarnerujussuaq kalaallillu oqartussaasuinit allakkanik uppernarsaatinik danskit oqartussaasuisa atugassaannik pissarsinialuusaartarnerup ajornartorsiutaasarnera assersuutigai.

- Allakkat paasissutissat pissarsiariniartarneri sivisungaatsiarsinnaasarpoq ilaannilu paasissutissat pigineqarneq ajorput. Taamaattoqartillugu inuit ikiorsiissutinik pisartagaqartitaasussaagaluit qaammaterpaalunni ikiorsiissutinik pineq ajorput, Sina Parbst Frederiksen oqarpoq.

Angerlarsimaffittaarusuttoq

Rosine Karlsenillumi Stenbroens Juristerip inatsisitigut siunnersuinissamik neqeroorutaa atorluarsinnaavaa.

Taassumami sullissisumi allanngorarneri ilungersunartissimavaa.

Isumaginninnermilu qassit sullissisorisimanerlugit naluaa.

- Paatsiveerusimaarnartaqaaq, inuttullu qanoq inissisimaninnik oqaluttuareqqiiuarnera qatsuppara. Tusaaneqarnanga misigisimavunga, taanna oqarpoq.

Initaarnissaminulli ikiorsiissutinillu pisartagaqalernissaminut Københavnip kommuniani sullissisuni ukiuni marlunni allanngorsimanngitsoq oqarpoq.

Unnuisarfinniittarnermi tujorminarsipallassinnaasarpoq.

- Assersuutigalugu unnuisarfinniittartorpassuit imigassartortarput. Nakkaannartarporlu. Ulluinnaallu imigassartuuffiulersarput, taanna oqarpoq.

Toqqissisimaffigisinnaasaminillu angerlarsimaffeqalernissi takorloornerarpaa.

- Initaarnissaq takorluukkama annersaraat. Siunissami qanittumi pissasoq neriuutigaara. Maanngaanniit aniguma e-boksera ammassavara, initaarsimanerlungalu takussavara, Rosine Karlsen oqarpoq Københavnillu aqquserngisut ingerlalerluni.