Romerit ullorsiutaat atorparput
Qaammatisiutitta taajuutaata "gregorianerit qaammatisiutaat" aallaavigivaa, katuullit romamiut oqaluffianni 1500-kkut nalaanni paveusimasoq Gregor aqqarneq pingajuat, qaammatisiutitsinnik atuutilersitsisoq.
Kristumiut romamiut katuullit oqaluffiata, romamiup Julius Cæsarip qaammatisiutaa ukiut 500-rut qaangiuttut atulersimavaat, qaammatisiutini tamani seqerngup qaammatillu nikerartarnerat eqqorlugu maleqqissaanerummagu.
Qaammatisiut qanoq isilluni nunani killerni siaruariartorsimanersoq oqaluttuarisaanermi ilisimatuup Thorkild Kjærsgaarip oqaluttuaraa:
- Siullermik gregrorianerit qaammatisiutaat nunani killerni aallaaviinnartut atorneqartarsimavoq, imaasiinnarlunilu atulerneqarsimanngilaq. Siullerpaamik katuullit atulersimavaat, naaggaartullu atorumasimanngikkaluarpaat kingusinnerusukkulli tunniutiinnarsimallutik, Thorkild Kjærsgaard nassuiaavoq.
Biibilip qaammatisiutaa juutinit qaammatisiutigineqartoq aallaaveqarpoq pinngortitsinermik. Juutit Kristusip inunngornerata siorna kingornalu qaammatisiutiminni atunngilaat, juutit amerlanerit akuerinnginnamikku Jiisusi Messiarsiusoq.
Gregorianerit qaammatisiutaat malillugu tassa ukioq 2012 angulerparput.
Biibili malillugu ukiortaartarpoq martsip naanerani aprililluunniit aallartinnerani, biibilillu qaammatisiutaa malillugu ukioq manna ukioq 5772-iuvoq. Biibilimi ukiortaaq ilisarnaataavoq upernalerneranit nutaamillu aallartittoqarneranit.
Gregorianerit qaammatisiutaat kristumiussusermut atassuteqanngitsoq Thorkild Kjærsgaarip oqaluttuaraa:
- Gregorianerit qaammatisiutaat romamiut naalagaaffianneerpoq biibilimullu atassuteqarnani. Romamiummi kingusinnerusukkut aatsaat kristumiunngormata. Julius Cæsari qaammatisiutiliorpoq Kristusip inunngornera ukiunik 45-nik sioqqullugu, taamani romamiut kristumiuunngillat kristumiussuserlu suli piunngilaq, taamaammat Guutimik nalusut qaammatisiuterivaat, Thorkild Kjærsgaard oqarpoq.
Katuullip mattuttup kisitsisariaaseq Jiisusip inunngornera malillugu 1500-kkut nalaanni eqquppaa. Jiisusip inunngornera taaneqartarpoq ukioq 0, taamasilluni eqqunneqarpoq qaammatisioriaaseq kristusip inunngornera sioqqullugu kingoqqullugulu.
Gregorianerit qaammatisiutaata taajuutaat romamiut Guutianneerput, assersuutigalugu qaammat marts taaguuteqartinneqarpoq Guutiat Mars assigalugu.
Biibilip qaammatisiutaa aqqarneq marlunnik qaammateqarpoq, qaammatillu taajuuteqartinneqartinneqaannarput kisitsisinit.
Qanga kristumiut gregorianerit qaammatisiutaat atulersimaneraat Thorkild Kjærsgaarip oqaluttuaraa:
- Kristumiut ilagiit romamiut naalagaaffiannut tulluarsarsimapput, ilimanarpoq piffissami siullermi biibilip tassa juutit ullorsiutaat atorsimassagaat. Kristumiullu siulliit ukioq 200 missaani Julius Cæsarip qaammatisiutaa atulersimavaat, Guutimik nalusut qaammatisiutigigaluaraat, Thorkild Kjærsgaard oqarpoq.
Qallunaap ulloriarsiortup Ole Rømerip Danmarkimi ukioq 1700-mi gregorianerit qaammatisiutaat eqquppaa, nunatsinnilu gregorianerit qaammatisiutaat atortuaannarnikuuvarput.
Ukiortaami tamassi pilluaritsi.
