Robotti imaannaanngitsoq Sermersuarmiiittoq
Biileeraq avataaniit aqunneqarsinnaasoq- miiterinik marlunnik portussusilik 360 kilo-nillu oqimaassusilik- seqerngup nukinganik ingerlateqarpoq, atortunik elektroniskiusunik ulikkaarpoq. Ilisimatuut misissuiviata Summit Camp-ip eqqaani sermersuup portunersaani paasissutissanik assigiinngitsorpassuarnik katersivoq, ilisimatuut klima pillugu suliaqartut atugassaannik.
Grover siunissami avataarsuani ullorissani misissuisussatut sanaajungaluarmat, sermersuarmi pissarsiai assut tupaallaatigineqarput.
- GROVER imminik ingerlasinnaavoq, GPS-imik aqunneqarluni qaammataasamullu atassuteqarluni ilisimatusarnermut paasissutissanik katersisussatut sanaajulluni, Grover-imik nunatsinnukaassisoq Gabriel Trisca nakkutilliisorlu oqarpoq.
Biileeraq Grover arlaleriarluni apummut marrittaraluartoq, seqinermik nukissiutai kisimik ajornartorsiutaasimapput. Sermersuup issinnerujussuanik naatsorsuutaasumiit nungujaarnerusaramik.
Misiligaanerulli iluatsilluartup ilisimatuut nutaanik takorluugaqartilerpai:
- Takorloorparput GROVER robot-eeqqanut aallaavinngortinniarlugu. Sermermimukartinneqarsinnaavoq imaluunniit ulloriarsuit arlaannukartillugu, roboteeqqallu sammivinnut tamalaanut aallarartittarlugit, NASA-meersoq Hans-Peter Marshall nutaarsiassaqartitsivimmut UPI-mut oqarpoq.
