Robinson Crusoep pissusaa Tallimanngornerup qatsulluinnarpaa
Robinson Crusoep qeqertannguamut ataatsimik inulimmut tikinnera, tikitamilu nammineq oqaatsiminut inooriaatsiminullu naleqqussaanera isiginnaartitsissummi Kalaallit Nunaanni pissutsinut assersuuniarneqarpoq.
Svenn B. Syrin Robinson Crusoep isiginnaartitsissussiarineqarnerani ilitsersuisoq,
ukiut arlaqartut Kalaallit Nunaanni najugaqarpoq, taamaattorli kalaallit oqaasii kulturiallu suli ilikkarsimanagit oqarpoq.
- Uanga nammineq kalaallit kulturiat oqaasiilu ilikkarsimanngilakka, tamanna nammineq ajornartorsiutigaara pisuussutigalugulu, kalaallit ajornartorsiutigisinnaanngilaat, Svenn B.Syren oqarpoq.
Robinson Crusoep Tallimanngornerup oqaasinik inooriaasianillu naleqqussaanera isiginnaartitsissusiami mumisinniarneqarpoq.
Svenn B. Syrinn isiginnaartitsissusiap ilusilersornerani imminut assertsuutiginngitsoorsinnaanngilaq.
- Kalaallit uanga oqaatsinnut naleqqussaqqullugit pimaffigisinnaanngilakka aamma oqaatsima paasineqarnissaat piumasarisinnaanngilara, Sven B. Syrin oqarpoq.
Mike F.Thomsen isiginnaartitsissusiami Tallimanngornertut inuttaasoq, isiginnaartitsissusiap oqariartuutaa pillugu ima oqarpoq:
- Nunamut takornartamut tikikkutta ikinnerussuteqarlutalu taava uagut nunamut tassunga tikitatsinnut naleqqussartariaqarpugut killormuunngitsoq.
Mike F. Thomsen Axel Raahaugelu isiginnaartitsissusiami inuttaapput.
Robinson Crusoe pillugu isiginnaartitsissusiaq Nuummi kulturikkut illorsuarmi Katuami martsip 30-ani takutinneqaqqaassaaq, tamatuma kingorna pingasoriarluni takutinneqassalluni. Taassuma kingorna Aasianni, Ilulissani, Qasigiannguani, Sisimiuni Nanortalimmi aamma Paamiuni takutinneqassaaq.
