Risskovimi pissuserissaartoqarnissaa Peqqinnissaqarfiup qulakkeerusuppaa
- Naak immikkoortortami R3-mi, kalaallit immikkoortortarisaanni, annertunerusumik ajornartorsiuteqannginneranik nalunaarusiaq takutitsigaluartoq, sulisut uninngasullu pitsanngorsagassanik taakkartugaqarsimapput, nakorsaaneq Anne Marie Ulrik tusagassiorfinnut nalunaaruteqarluni taama allappoq.
Nalunaarusiami sumulluunniit attuumassuteqanngitsumi, maajip 16-iani saqqummersumi, tarnimikkut nappaatilinnut pineqaatissinneqarsimasunut katsorsaavimmi Risskovimi sulisut ilaasa nikassaarpaluttumik oqaluttarnerat naleqqutinngitsumillu pissusilersortarnerat ilaatigut isornartorsiorneqarpoq.
Immikkoortortamili R3-mi, kalaallit immikkoortortarisaanni, ajornartorsiutit annertuujunngitsutut nalilerneqarput. R3-mi uninngasut sulisut torersumik oqalunnerartarpaat, sulisulli ilaat naalakkersuerpaluttumik sakkortuumillu oqaluttartut aamma oqaatigineqarluni. Peqatigisaanik aamma kulturikkut assigiinngissutit pillugit ajornartorsiuteqarnera arlalinnit eqqaaneqarsimavoq.
R3-mi sulisut immikkoortortami isumannaallisaaneq ilaatigut isornartorsiorpaat, sulisunik ikilisaanerup kingunerisaanik ajorseriarsimanerarlugu. Sulisut ilaat isumaqarput isumannaallisaaneq annikillisinneqarsimasoq.
Nakorsaanerup Anne Mette Ulrikip naqissuserpaa, Kalaallit Nunaanni peqqinnissaqarfiup Risskovimilu pisortat suleqatigiinnerat pitsaasuusoq, nunatsinniillu napparsimmavissuarmut tikeraartoqalerpat nalunaarusiami isornartorsiorneqartut qaqinneqarumaartut.
Risskovip kalaallinut immikkoortortaani R3-mi Sanamilu tarnimikkut napparsimasunut immikkoortortami A1-imi sulisut qaammammut ataasiarlutik oqarasuaatikkut ataatsimeeqatigiittarput uninngasut ataasiakkaat eqqartorneqartarlutik. A1-imi, Risskovimi kommuninilu najugaqatigiiffinni kiisalu Pinerluuteqarsimasunik Isumaginnittoqarfimmi pisortat ukiumut ataasiarlutik ataatsimeeqatigiittarput suleqatigiinneq uninngasullu eqqartortarlugit, Peqqinnissaqarfik tusagassiorfinnut nalunaaruteqarluni taama nassuiaateqarpoq.
Jens B. Frederiksenip Demokraatineersup nalunaarusiami paasineqartut aallaavigalugit Naalakkersuisut qanoq iliorniarnerannik apeqquteqaateqarnerata kingorna taama tusagassiorfinnut nalunaaruteqartoqarpoq.
