Amerikamiut timmisartorsuata B-52-ip atomip nukinganik sakkussianik usilluni Pituffiup eqqaani 1968-imi nakkartup nunamik mingutsitsinerata peqqissutsimut ulorianaataata sukumiisumik misissuivigineqarnissaanik Ilisimatuutut misissuiffik RISØ Naalagaaffiullu qinngornernut ulorianartunut illersornissamut ilisimatusarfia Namminersornerullutik Oqartussanit 2007-imi piumaffigineqarput.
Misissuinerillu allat assigalugit, Avanersuarmi nunamik mingutsitsinerup innuttaasut peqqissusaannut sunniuteqannginnera nalunaarusiami inerniliinermi oqaatigineqarpoq.
Qinngornernut ulorianartunut illersornissaq tunuliaqutaralugu naliliinermi mingutsinneqarsimasumik maannakkut atuinissamut killilersuisoqartariaqanngilaq saliisoqartariaqaranilu. Avanersuarmilu najugallit timaasa plutoniumimik akoqarsinnaanerat pillugu misissuinissaq pisariaqanngitsutut aamma naliliivigineqarpoq.
Qaanaami innuttaasut misissuinermi paasisanik ullumi ilisimatinneqarput. Nalunaarusiami innersuussutaasut malitseqartinneqarnissaat Kalaallit Nunaata Danmarkillu suleqatigiissitaanni decembarip arfineq-pingajuanni 2011-mi oqaluuserineqassapput. Suleqatigiissitap Kalaallit Nunaanniit aallartitai Avanersuarmeersuupput, Namminersorlutillu Oqartussaneersuullutik.