TAKORNARIAQARNEQ Ilulissani takornarianut pissutsit naleqqutinngitsut
Fem million koruunit nalinginut Ilulissani umiarsualivimmi atortussanik sanaartortoqarnissaa takornariaqartitsineq ineriartortinniarlugu periusissiami nutaami pilersaarutaavoq.
Tamannalu aamma pisariaqarpoq, tassami puttasuni pingasuusuni marluk ukiukkut anorlernerani tammarsimapput, maannalu avannaani ujaarineqarlutik. Taakku Saqqami januarimi kingullermik takuneqarsimapput.
Aasamullu takornariarpassuarnut Ilulissiarniartunut eqqasuutaasinnaavoq.
-Meterinik marlunnik silissusilimmik mikisunnguamik puttasoqarpugut. Aterfiginiaraanni majuartarfittai qajannartorujussuupput meterillu affaannaanik silitsigalutik. Umiarsuillu takornariartaatit ilaasutik ikiniaraangamikkit ilaanni umiatsiaaqqat pullattakkat sanileriit pingasuusinnaasarput, uagullu ikisaqarniarutta utaqqiinnartariaqartarpugut, taamaasillutalu akunnerup affaa utaqqisinnaasarluta. Tamanna pitsaanngilluinnarpoq, Ilulissat Water Taximi piginnittoq, Anders Lykke Laursen oqarpoq.
Aamma atuaruk Takornariat amerlisarnissaannut nutaamik periusissiortoqartoq
Pissutsit ajorluinnartuusut taanna isumaqarpoq.
-Takornariaqarneq pimoorunneqanngitsutut saqqummiunneqarpoq, nunarpullu soqutiginninngittutut saqqummerpoq. Sungiussisimarpalunngitsutut aamma saqqummerpugut. Taamaakkusunnanngikkaluaq, sualummik uatsinnut nammineq inuussutissarsiuutilinnut. Uggornaqaaq, uggornarnerpaavorli takornariat angerlamut uteraangamik nunatsinni pissutsit oqaluttuarisarmatigit, taamaasilluni nunarput kinguarsimanersuunersoq inuit eqqarsartassapput. Massa taamaannata, namminersortoq Anders Lykke Laursen KNR-imut oqarpoq.
Sissiukkanut tunngasut kinguaattoornermik kinguneqartartut periusissiami nassuiarneqarpoq, tamannalu takornariat nunamut ikaassagunik sivikinnerusumik nunamiinnerinik kinguneqartartoq.
Tamannalu iluanaarnissamut toqqaannartumik kinguneqarnerluppoq.
Qaasuitsup Kommunianit Radioaviisimit oqaaseqartitsiniaraluarsimavugut, ilautsinnaguli.