Tassaarsuaq RG-p Ummunnap sulluani aalisakkani tunisineq unitsikkaa
Royal Greenland tusagassiorfinnut nalunaaruteqarluni allappoq Uummannap sulluani Royal Greenlandip tunisassiorfiinut tunisineq unitsikkallarneqartoq.
- Uummannap sulluani pingaartumillu Nuugaatsiami pisut ilungersunartut paasilluarpagut, tassami inuit maqaasineqartutut nalunaarutigineqartut Royal Greenlandimut sulisuinullu attuumassuteqarmata, Royal greenland allappoq.
Ilutigalugulu nunap sajoqqissinnaanera innuttaasunut suli aarlerisaarutigineqarpoq. Taamaammat aqutsisunit aalajangerneqarpoq Royal Greenlandip Uummannami pigisaanilu tunisassiorfiinut tunisineq unitsikkallarneqassasoq, Niels Ole Møller Uummannap pigisaani tunisassiornermi ingerlatsisoq tusagassiuutinut nalunaarummi taama oqarpoq.
Royal Greenlandip nalunarutaa naapertorlugu tunisinerit qaququ ammaqqinneqassanersut suli ilisimaneqanngilaq.
Tunisassiornermi ingerlatsisup Uummannami tunisassiorfimmi ingerlatsisoq aammalu Ukkusissani, Saattuni Ikerasammilu tunisassiorfinni aqutsisut suleqatigalugit pisunik nalilersuissapput, tamatumalu kingorna pisanik nutaanik qaqugu tulaassuisoqaqqissinnaanissaa aalajangiunneqassaaq.
