GEUS: Nuna sajussimanera sisoorsimaneraluunniit pisuunersoq ilisimaneqanngilaq
- Nunap sajussimaneranut takussutissaasinnaasunik nunap sajunneranut uuttortaavinni maluginiagaqarpugut, nunamilli sisoortoqarsimasinnaaneranik aamma takussutissaqarpoq.
Nunap sajuttarneranik ilisimasalik GEUS-imeersoq Peter Voss taama oqarpoq.
Taassuma oqaatigaa qaqqaq annertooq sisoorsimasinnaasoq GEUS-imiit ilimagineqartoq, tamannalu tassaarsuaqarneranik kinguneqartitsilluni.
- Qaqqap annertuup sisoornera kangerlummut tussimasinnaavoq, taamaalilluni malerujussuit pilersillugit.
AAMMA ATUARUK Eqqugaasut ikiorneqassapput
Taamaattoq naatsorsuinerit kisiisa aallaavigalugit nunap sisoorsimasinnaaneranik ilimagisaqarneq ilumoornersoq GEUS-imiit suli inerniliunneqarsinnaanngilaq. Tamannalu uppernarsarneqassappat takunnittunik pisariaqartitsillutik Peter Vossip oqaatigaa.
Immap iluani aamma sisoortoqarsimasinnaavoq, taamaattoqarsimassappalli paasiniarnissaa ajornakusoorsinnaavoq.
Pisorlu ima oqaluttuaraa.
- Takusinnaasarput malillugu uuttuut Nuugaatsiap nalaaneersoq siullermeerluni nalunaaqutaq 21.40 malussarpoq, minutsillu arfineq-pingasut qaangiuttullu nunaqarfimmi tassaarsuaqarpoq.
Uuttuinerillu malussarfiugaluartut aarlerisaarisoqarsinnaasimanngilaq, taamaalilluni Nuugaatsiarmiut tassaarsuaqartinnagu kalerrinneqarsinnaatillugit.
- Upalungaarsimatitaqanngilagut, pisullu nalaani, tassa qallunaat nunaata nalunaaqutaa malillugu, maani sulisut sulinngillat. Taamaattumik paasissutissat taakkua pisinnaasimanngilagut. Ajunaarnersuaqarsimanera ullaaq aatsaat paasivarput.
AAMMA ATUARUK Nuugaatsiarmiut 39-t qimagutitinneqartut
Islandip kujataani nuna sapaammi aamma sajuppoq. Tamannali pissusissamisuuinnartoq Peter Voss nassuiaavoq. Nunallu sajunnera avannaani pisunut attuumassuteqanngilaq.
- Islandimi nuna ukioq naallugu sajuttuartarpoq. Tamannalu Kalaallit Nunaanni ernummatigineqartariaqannsilaq.
Taama oqarpoq nunap sajuttarneranik ilisimasalik GEUS-imeersoq Peter Voss.
Politiit arfininngornermi unnukkut qulinut innuttaasumit nalunaarfigineqarnerisa kingorna annaassiniarneq aallartippoq.
Tassaarsuup portussusaa paasiniarlugu ilisimatuut Nunatsinnukartinneqassanersut GEUS-imi eqqarsaatigineqarpoq.