RG: Ipititsiniaanngilagut
- Arlaannaanilluunnit ipititsiniaanngilagut, iliuuserisagut tamarmik niuerpalaartumik tunngaveqarput, Royal Greenlandimi tunisassiornermut pisortaq Lars Nielsen oqarpoq.
Royal Greenland sapaatip akunnerata siuliani Qeqertaq fishimi piginneqataassutit 58 procentiinik pisiaqarpoq, tamannalu Halibut Greenlandimi pisortaanit sakkortuumik uparuartorneqarpoq.
- Politikkerit isummersuutigisariaqarpaat, suliffeqarfik inuiaqatigiinnit pigineqartoq, inuiaqatigiit aningaasaataat tunuliaqutaralugit, suliffeqarfimmik namminersortumik, inuit nammineerlutik aningaasaliiffigalugu pilersissimasaannik ipititsiniaassanersoq, pisortaq Niels Thomsen oqarpoq nassuiaalluni kisermaassisoqalissappat tunisinermi qalerallit akii appariarsinnaasut.
Royal Greenlandimiilli uparuaaneq tunngavissaqarsorinngilaat.
- Piginneqataassutsinik pisinerput suliffeqarfiup nukittunerulernissaanut iluaqutaasussaavoq, tamannalu sooq uparuartorneqassanersoq paasiuminaatsipparput, tunisassiornermut pisortaq Lars Nielsen oqarpoq.
Naalakkersuisut siulittaasuat Kuupik V. Kleist namminersorlutik oqartussat suliffeqarfiutaanut akisussaasuusoq uparuaanermut tunngatillugu oqaaseqartissinnaasimanngilarput.
