Republikaneriusimasut nutaamik partiiliornissamik oqallittut
USA-mi atorfilittat republikanerit 120-nit ikinnerunngitsut, aallartitat, iliuusissanillu aaqqissuisut republikanerinit anillutik nutaamik partiiliornissamut isumaqatigiinnialeruttorput.
USA-p præsidenterisimasaata Donald Trumpip tamat oqartussaaqataanerannik innarliiniarnera akerleralugu republikanerit partiiata Trumpimut illuatungiliisinnaannginnera tunngavilersuutigaat.
Republikanerit sinnerlugit siornatigut qinigaasimasut, Ronald Reaganip, George H. W. Buship, George W. Buship Donald Trumpillu præsidentiunerini atorfilittaasimasut, aallartitat republikaneriusut iliuusissanillu aaqqissuisut isumaqatigiinniaqataapput.
Inuit sisamat oqallinnerni peqataasut taama oqaluttuarput.
AAMMA ATUARUK Trump republikanerillu Repræsentanternes Husimi amerlanerussuteqaqqilerusuttut
Inuit 120-nit ikinnerunngitsut partiip republikaneriusimasunik ilaasortallip politikkikkut tunngavissai suussanersut pillugit kingullermik tallimanngornermi ataatsimiipput, partiip qanganitsanik pingaartitsisup tunngavissai oqallisigineqarlutik. Nunap tunngaviusumik inatsisaata malinneqarnissaa, naalagaaffillu inatsisit tunngavigalugit naalakkersugaq oqallisigineqartunut ilaapput.
Qinersinerni qinigassanngortitsinissaq pilersaarutaavoq, soorlu aamma talerperliit akornanni politikkikkut qiterpasissunik tapersersuisunik tapersersuinissaq oqallisigineqartoq. Tassa republikaneriugaluaraanni, attaviitsuugaluaraanni demokratiugaluaraanniluunniit tapersersornissaat siunertaavoq.
Oqallinnernut peqataasut ilaat taama oqarput.