Republikanerit Bidenip peqquserlussimaneragaanera pillugu saqqummiilersut

Joe Bidenip politikkimi saqqumilaaqqileruttornerani, republikanerit sinnerlugit senatori Hunter Bidenip peqquserlussimaneragaanera pillugu misissuinermit saqqummiinialerpoq.

Joe Bidenip ernerata, Hunter Bidenip, Ukrainep gassi pillugu suliffeqarfiutaani Burismami siulersuisuni ilaasortaasimanera pillugu misissuinermit nalunaarusiaagallartoq saqqummiunneqassasoq, senatorip Ron Johnsonip pingasunngornermi oqaatigaa.

- Nalunaarusiaagallartoq qaammatip ataatsip marlulluunniit iluanni saqqummiussinnaassallugu neriuutigaara, senatori taama oqaaseqartoq, Reuters allaaserisaqarpoq.

Joe Biden USA-mi demokraatit præsidentinngorniunnermut sassartitassaannik USA-mi nunap immikkoortuini 14-ini marlunngornermi qinersinersuarmi angusaqarluareersorlu senatori taama nalunaaruteqarpoq.

AAMMA ATUARUK Præsidentinngorniuttussanik qinersinersuarmi Joe Biden angusarissaarnerpaasoq

Demokraatit præsidentinngornerniunnermut sassartitaassaat taamaalillutik marluinnanngorput, taakkualu tassaapput Joe Biden Bernie Sandersilu.

- Joe Bidenip apeqqutit erseqqissumik akinikuunngisai arlaqarput.

- Demokraatitut qinersisartuugaluaruma qinersinnginninni piumasarissagaluarpara apeqqutit taakkua erseqqissumik akissagai, Ron Johnson oqarpoq.

Hunter Biden Burismami sulivoq, angutaa præsident Barack Obamamut tullersortaanerata nalaani.

Hunter Biden Donald Trumpimit republikanerinillu siusinnerusukkut saassussinneqarlunilu peqquserlussimasutut oqaatigineqarnikuuvoq. Peqquserlussimaneranilli suli uppernarsaasoqarnikuunngilaq.

Hunter Bidenip angutaatalu Joe Bidenip peqquserlussimaneragaanertik ilumuunnginnerarpaat.