Præsidentinngorniuttussanik qinersinersuarmi Joe Biden angusarissaarnerpaasoq

Bernie Sanders præsidentinngorniuttussanik marlunngornermi qinersinersuarmi angusarissaarnissamik siulittuutigineqarnermisulli angusarissaartiginngilaq. Taanna Joe Bidenilu demokraatit præsidentinngorniunnissamut sassartitassaattut unammisussanngorpasipput.
- Aatsaat taama siuaqqittoqartigineranik takuvunga, qinersinernut ilisimasalik Matt Seyfang nittartakkakkut nutaarsiassaqartitsivimmut Politicomut oqarpoq. Assi © : Mike Blake/Reuters/Ritzau Scanpix
Allattoq Ritzau
marsip 04-at 2020 11:36
Nutserisoq Ivik Kristiansen

77-inik ukiulik USA-mi præsidentimut tullersortaasimasoq, Joe Biden præsidentinngorniuttussanik qinersinersuarmi, Super Tuesdayimik taaneqartartumi, angusaqarluarpoq.

Joe Biden USA-p naalagaaffiisa ilaannit 14-init demokraatit præsidentinngorniunnissamut sassartitassaannut marlunngormat qinersiffiusunit qulini qinerneqarnerpaajuvoq. Aamma nalagaaffiit ilaanni Mainemi taaguussinernik pingasunngornermi suli kisitsiffiusumi qinigaanerpaaratarsinnaavoq.

Joe Biden Donald Trumpip novembarip ulluisa pingajuanni præsidentinngorniunnermi unammillertussaatut amerlasuuniit naatsorsuutigineqalereerpoq.

- Aatsaat taama siuaqqittoqartigineranik takuvunga, qinersinernut ilisimasalik Matt Seyfang nittartakkakkut nutaarsiassaqartitsivimmut Politicomut oqarpoq.

AAMMA ATUARUK Bernie Sanders demokraatit New Hampshiremi qinersineranni ajugaasoq

Bidenip februaarimi qinersinerni siullerni pingasuni, tassalu Iowami, Hampshiremi Nevadamilu qinersisui naatsorsuutigineqartumit ikinnerupput, qinersinernilu ajorsarluni. Tamatuma saniatigut aningaasat qineqqusaarnerminut atugassai nungulersut oqaatigineqarpoq. Aningaasat USA-mi politikkimi sunniuteqartupilussuusarput.

South Carolinamili arfininngormat qinersineq allannguivoq. Tassani taartunik amilinnit qinerneqarluarami naatsorsuutigineqartumit amerlanernit qinerneqarluni ajugaavoq. Tamatumunnga ilutigitillugu sassartussatut qineqqusaartut marluk Pete Buttigieg Amy Klobucharilu qineqqusaarnermit tunuarput.

Taakkualu Super Tuesdayimi siumut ingerlaartilerpaat, ilaatigullu Texasimi Virginiamilu ajugaavoq.

Demokraatit præsidentinngorniunnissamut sassartitassaattut unammisut Super Tuesdayip kingorna marluinnanngorpasipput, tassalu Joe Biden taavalu Bernie Sanders.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk