Rektorip Ilinniarfissuarmi pisortaq taarserpaa

Ilinniarfissuarmi ilinniarnerup qaffasissussaa ajorluinnarluni appasittoq, nalunaarusiami nutaami ersersinneqarpoq. Immikkoortortamilu pisortaq piffissami sivisunermi peqartussaannginneranik tamanna kinguneqarpoq.
Allattoq Ivik Kristiansen
apriilip 15-at 2016 05:37

Ilinniartitsisunngorniarluni ilinniarfimmi aqutsinikkut nukittorsaasoqarnissaa siornali aalajangerneqarsimasoq, Ilisimatusarfimmi rektorip oqaatigaa. Ilinniarfissuup ilaatigut aqutsinikkut ajornartorsiuteqarluinnartoq Danmarkimi Naliliisarfiup inerniliussaa pillugu rektor Tine Pars oqaluttuarpoq. Kinguneqartitsereerporlumi. Immikkoortortamimi pisortaq piffissami sivisunermi peqartussaannginneranik maanna aalajangerpoq.

- Institutlederiusimasoq piffissami sivisuumi suliffeqarfimmi peqannginnissaa pissutaalluni Britta Lohmann institutlederiugallarpoq, Tine Pars oqarpoq.

Aamma atuaruk Ilinniarfissuaq EVA-p naliliinerani angusinngitsoortoq

Meeqqat atuarfii pillugit ukioq kingulleq naliliisoqarpoq, taassuma kingorna Tine Pars aalajangerpoq ilinniartitsisunngorniarfik misissuiffigineqassasoq. 

Maanna misissuineq taanna naammassereerpoq, ilinniartitsisunngorniartullu ilaasa atuartitsinissaminnut piareersarluarneqarnatik ilinniakkaminnik naammassinnittarnerat ilaatigut tikkuarneqarluni. 

 Paasillugit pissutsit qanoq ittuusut, soorunalimi tupannarpoq, rektori oqarpoq.

Danmarkimilu ilinniartitsisunngorniat naammassinninnissaannut piumasaqaatit malinneqassappata arlallit naammassinninnavianngikkaluartut aamma inerniliunneqarpoq.

Ilinniarfiullu pitsanngorsarnissaanik qanoq iliortoqassanersoq, aqutsisuusussat inissilluareerunik pilersaarusiorlugit suliassariumaaraat, Tine Pars oqarpoq. 

Rektorili ilinniarfiup qanoq ineriartortinneqarnissaanut kissaateqarpoq.

- Ilinniarfiit allat, Ilisimatusarfiup ataaniittut assigalugit ammanerunissaq, ilinniarfinniit allaninngaanniit ilinniartitsisoqarsinnaaneq, ilisimatusarnermik aallaaveqartumik ilinniartitsisinnaaneq avammut atuarfinnut ammanerunissaq pisariaqavissutut isigivara.