Najukkaminnit qimaasariaqarsimasut siorna aatsaat taama amerlatigisut
Inuit najukkaminnit qimaasariaqarsimasut nunarsuaq tamakkerlugu siorna aatsaat taama amerlatigaat.
Inuit 59,1 millionit nunami najukkami iluani najukkaminnit sumiiffimmut allamut siorna qimaasariaqarsimanngikkunik nuuttariaqarsimapput.
Suliniaqatigiiffiup naalagaaffimmut pituttorsimanngitsup IDMC-p nalunaarusiaani tamanna takuneqarsinnaavoq. Qimaasut pillugit Norgemi sulniaqatigiiffik Flyktninghjelpen aamma nalunaarusioqataavoq. Inuit najukkaminnit nunarsuaq tamakkerlugu qimaasariaqarsimasut IDMC-p nalunaarsortarpai.
Nunani assigiinngitsuni aaqqiagiinngissutinit ajunaarsuaqarneraniillu qimaallutik nuuttariaqarsimasut taakkunanit nalunaarsorneqartarput.
Inuit najukkaminnit qimaasariaqarsimasut siorna 38 millioninik amerlipput, taakkunanngalu amerlasuut najukkaminnit arlaleriarlutik nuuttariaqarsimallutik.
AAMMA ATUARUK Naagga qujaannarpugut: Kalaallit Ukrainimiit qimaasunik tikisitserusunngillat
Inuit najukkaminnit qimaasariaqarsimasut ukiup ataatsip ingerlanerani ukioq 2020-mi aatsaat taama amerlatigereerlutik siorna aatsaat taama amerlatigaat, inuimmi ajunaarsuaqarneranit qimaasut ukioq 2020-mi aatsaat taama amerlatigimmata.
Najukkaminnit qimaasariaqarsimasut nunarsuaq tamakkerlugu siorna 59,1 millionit qaangerlugit ukioq manna 2022-mi amerlanerunissaat ilimagineqarpoq.
Pingaartumik Ukrainemi sorsunnerup kinguneranik qimaasariaqartut amerlanerunissaat naatsorsuutigineqarpoq.
Inuit 8 millioninit amerlanerusut Ukrainep iluani februaarip ulluisa 24-annili qimaasimapput.
Taakku saniatigut 6 millioninit amerlanerusut Ukraine qimallugu nunamut allamut qimaasimapput.
