Naagga qujaannarpugut: Kalaallit Ukrainimiit qimaasunik tikisitserusunngillat

Ruslandip Ukrainemut februaarip 24-anni saassussineraniilli inuit 4,7 millionit missaanniittut nunaminnit qimaapput.

Sorsuttoqarnerata kingunerisaanik nunaminniit qimaasariaqarsimasut aatsaat taama sorsunnersuup aappaata kingornaniit amerlatigaat. Taamaakkaluartoq nunatsinni innuttaasut 47,4%-ii Ukrainimi qimaasunik tikisitsisoqarnissaanut naaggaartut, 26,2%-ii qimaasunik tikisitsisoqarnissaanut akuersaarput. 26,4%-ii qanoq isumaqarnerminnik paasititsinngillat.

Apeqqut taanna KNR-ip tusarnaartartuinik isiginnaartartuinillu marsip naaneranit apriilip aallartinneranut misissuinermut atatillugu apeqqutigineqarpoq.

- Nutaarsiassaqartitsivimmi samminikuuarput. Siornatigut aamma eqqartorneqartarnikuuvoq nunanit allanit qimaasut nunatsinnut tikisinneqassanersut. Kisianni innuttaasut taama amerlatigisut isumaat ataatsikkut paasisinnaareeratsigit periarfissaq taanna atorlugu apeqqut taanna ilanngupparput, KNR-ip nutaarsiassaqartitsiviani pisortaq, Alice Sørensen oqarpoq.

Illoqarfinni angutit qimaasunut arnanit akuersaarnerusut

Misissuititsinermit kisitsisit takussutissiisut inernernik qularnaarinnivissunngillat. Taamaattoq arnat Ukrainimiit qimaasunik tikisitsisoqarnissaa kissaatiginnginnerugaat kisitsisit itisilernerullugit misissoraanni takussutissiipput. Arnammi 19,5 procentiinnaasa tikisitsisoqassasoq kissaatigigaat, angutit 30,9 procentiisa tikisitsisoqassasoq kissaatigaat. Arnat 48,4 procentiisa qimaasunik tikisitsisoqarnissaa kissaatiginngilaat.

Ukioqqortussutsit aallaavigalugit apeqqummut akissutit qimerlooraanni inuusuttut 18-iniit 29-t tikillugit ukiullit ukioqqortussutsinut allanut sanilliullugit Ukranimit qimaasunik tikisitsisoqassanngitsoq kissaatiginerpaavaat. 50 procentiimi taama isumaqarput. Utoqqaanerilli 60-iniit 80-it akornanni ukiullit 31,3 procentii qimaasunik tikisitsisoqarnissaanut akuersaarnerupput.

Kisitsisittaaq ukrainemit qimaasut pillugit nunaqarfinni illoqarfinnilu isummat assigiinngitsorujussuusut takutippaat. Nunaqarfinnit 55,8 procentiisa nunatta qimaasunik tikisitsinissaa kissaatiginngikkaat illoqarfinni tamanna 45,5 procentiuvoq.

Aperaa KNR-imit misissuisuuvoq. Misissuinermi inuit katillugit 332-t peqataapput, taamaammat kisitsisit qulanangaatsiarput.