Raajat akikillisut

Ukioq manna ukiup sisamararterutaata aappaani raajat akii 17 procent-ersuarmik apparsimapput, siorna taamaasineranut naleqqiullugu. Saarullinniartulli nuannaarutigisinnaavaat, saarulliit akii 11 procentimik qaffassimammata ukioq manna piffimmi tassani.

Raajat nalingisa appariartorneri taamatuttaaq takuneqarsinnaapput nunap avammut tunisartagaanni. Kalaallit Nunaanni Naatsorsueqqissaartarfik malillugu, ukioq manna qaammatini arfinilinni siullerni avammut tunisinerup nalingi 124 million koruuninik appariarsimapput, 2016-imi qaammatini arfinilinnut siullernut naleqqiullugit.

AAMMA ATUARUK Royal Greenland naatsorsuutitigut ingerlalluartoq

Aalisakkerifferujussuup Royal Greenland-ip aammaattaaq malugisimavaa, nunani tamani niuffannermi akit apparsimammata. Ukiup affaanut naatsorsuusiaanni atuarneqarsinnaavoq raajanik nunanut allanut tunisinermi aningaasat isertitat annikillisimasut. Tamanna ilaatigut peqquteqarpoq akit apparnerisigut aammalu tuluit pund-iata naleerukkiartorneratigut, tuluit Brexit-imut angerlutik taasereerneratigut.

Raajanik aalisartulli nuannaarutigisinnaavaat raajartassat aappaagu amerlissagunarmata. Pinngortitaleriffiup piareersimaffigaa Nunatta Kitaani rajartassanut innersuussatik 90.000 tons-imiit 105.000 tons-imut qaffanniarlugit.

AAMMA ATUARUK Aappaagumut amerlanerusunik raajartassiisoqartoq