Realdania Ilulissat kangerlua pillugu illorsuassamut 75 millioninik aningaasaliivoq
![](/sites/default/files/styles/image_934x467/public/article_images/baad_i_isfjord_01.jpg?itok=VPZSJBD1)
Taama oqaluttuarpoq Realdania-imi sulianik pilersaarusiornermi pisortaq Lars Autrup.
Soorlu ippassaq KNR-imi allaaserineqartoq, Ilulissat kangerluaniittumi illorsualiornissamik pilersaarutip piviusunngornissaa ilimanarsivoq, illorsualiornissamut aningaasaateqarfik Realdania tapiimmat.
Aningaasaateqarfik Realdania Kalaallit Nunaanni suliamik ajunngitsumik siunertaqartumik piffissami sivisuumi aningaasaleerusussimavoq, mississueqqissaartoqarneratalu kingorna Ilulissat kangerlua pillugu illorsuarmik sanaartornissamut aningaaliinissaq aalajangiunneqarluni.
Aamma atuaruk Politikerit illorsuarmut tapersiisut
Kalaallit Nunaanni inuiaqatigiit ineriartornerat ajunngitsumik tapersersorneqarnissaa aningaasaateqarfiup periarfissatsialattut isigaa, tassani takornariaqarnikkut aamma nunat tamat silap pissusaa pillugu soqutigininnerulernissaanut tapertaassammat, Lars Autrup oqarpoq.
Suliniut ajunngilluinnartutut isigaarput aningaasatigut tapiissuteqarnitsigut suliniummut aalajangersimasumut attuumassuteqaannarani ineriartornermut ajunngitsumik ingerlasoq tapersersorneqarluni, Lars Autrup oqarpoq.
Ilulissat kangerlua pillugu illorsuup sanaartorneqarneranut aningaasartuutit 108 million koruuniunissaat naatsorsuutigineqarpoq, taakkua sulianut ineriartortitsinernut nunagissaanermut saqqummersitsinermut kiisalu illorsuaq pillugu paasisitsniaanermut atorneqassapput.
Aamma atuaruk Eqqissisimatitap illorsuartassaa qalliallanneqartoq
Ilulissat kangerlua pillugu illorsuup sanaartorneqarneranut Realdania 75 million koruuninik aningaasaliinerata saniatigut Qaasuitsup kommunia aamma Namminersorlutik Oqartussat 23 million koruuninik aningaasaliissuteqarniarput.
Aningaasat sinneruttut 10 million koruunit saqqummersitsinermut aamma atorneqartussat aningaasaateqarfimmit allamit pissarsiarineqassapput. Arlalinnik oqaloqateqartarpugut suliniumut soqutiginnittoqarluarpoq, Lars Autrup aningaasaateqarfimmi Realdania-imeersoq oqarpoq.