Illorsuaq Ilulissat Kangerluata eqqissisimatitaanera pillugu kateriffiusussaq qangalili kissaataavoq. Kissaatigineqartorlu maanna qanilliallanneqarpoq, tassami aningaasaateqarfik, Realdania, Qallunaat Nunaanneersoq maanna aalajangersimavoq suliniut aningaasartuutissat eqqarsaatigalugit akilisinnaanersoq misissuiffiginiarlugu:
- Tassa misissorneqartussanngorpoq suliummut aningaasartuutissat imarisassaalu eqqarsaatigalugit piviusorsiortuunersoq, Naja Habermann, Ilulissat Kangiata eqqissisimatitaaneranik UNESCO sinnerlugu aqutsisoq oqarpoq nangillunilu:
- Misissuinerup inernerata takutissavaa suliniut aningaasaateqarfimmit tapiiffigineqassanersoq.
Ilulissat Kangerluat UNESCO-p nunarsuarmi eriagisassatut allattorsimaffiani 2004-mi ilanngunneqarpoq sermip iigartartup immikkuullarissuunnera pinngortitamilu kusanartumiinnera peqqutigalugit:
- Illorsuaq eqqartugarput 1300 kvadratmeterit missaatut angissuseqassagunarpoq - kisianni ilusissaa angissusissaalu suli aalajangiunneqanngilaq - taannalu Ilulissat Kangiata Nunarsuarmioqatigiinnut kingornutassanngortinneqarsimasup aallartiffiata eqqaaniittussaava mittarfitoqqami, Naja Habermann oqarpoq.