Timmissat piniaqqusaalernerat assigiinngitsunik isumaqarfigigaat

KNR-ip aalisartut piniartullu Nuummi kalaalimineerniarfiup eqqaani naapimmagit tulukkat naajallu piniarneqarsinnaalernerannut nuannannatillu ajorinninngillat.

Timmissat amerlavallaalersimapput, taamaammat timmissat eqqissisimatitaanerat ukiuni tallimani misiliutitut Naalakkersuisunit atorunnaarsinnaarsinneqarpoq.

Jokum Jessen KNR-ip Nuummi aalisartunit naapitaasa ilagaat, taassuma tulukkat naajallu ikilisikkusuppai. Amerlavallaalersimasummi taanna isumaqarpoq.

AAMMA ATUARUK Ravne og måger kan begynde at frygte for livet

Timmissalli eqqissisimatitaajunnaarnerat tamanit taama tiguneqanngilaq. Naak aalisartup Johannes Heilmannip siunertarineqartoq paasisinnaagaluarlugu piniaqqusaalernerannut iluaqutissamik takusaqarsinnaanngilaq.

- Piniarneqartalernerat iluanaarutissartaqarpat ajorineqanngilaq. Ukiut arlaqartut qaangiupput tulukkat isigaasa tunineqarnertarnerat iluaqutigineqarsimasoq, Johannes Heilmannip eqqaavaa.  

Johannes Heilmannip oqarnera naapertorlugu tulukkat naajallu ukiup ilaani aallaaneqarsinnaatitaasarput, periarfissarli tamanna atorneqarneq ajortoq nassuiaatigaa. Taamaammat misiliisoqarnera eqqarsarnartoqartippaa.

- Tupaallannarpoq. Kisianni soorunami iluaqutissartaqannginnera aamma illuatungeralugu piniartup tassami aallaaniartartup iluaqutigisinnaanngikkuniuk soqutiginavianngilaa, Jokum Jessen oqarpoq.

Timmissat pillugit nalunaarut nutaaq ukioq manna novembarip aallaqqataani atuutilerpoq, ukiunilu tallimani misileraasoqareerpat suliniut ataavartunngortinneqassanersoq nalilersuiffigineqassaaq.