The Ravens Storm – kulturikkut anersaakkullu angalaneq
Pipaluk K. Jørgensen, isiginnaartitsissutinik nunatsinni angallassilluni isiginnaartitsissutigineqartunik ’Oqarit Inuullutillu’-mik Tulukkamillu” ilitsersuisutut amerlanerit eqqaamassajunnarsivaat. Aamma KNR-ikkut aallakaatitassiamik ’Oqarit’-mik suliarinnittuuvoq.
Pipaluk K. Jørgensen arnaavoq sullarissoq inuiaqatigiinni ajornartorsiutinik sammisaqarluni suliniuterpassuarnik ingerlataqartartoq, soorlu ass. imminut toquttarneq, qanigisanik atoqateqartarneq kinguaassiutitigullu atornerluineq. Ajornartorsiutinilli sakkortuunik sammisaqartutuinnaq ilisarisimaneqanngilaq. Ilaatigummi aamma isiginnaagassiamut 'Oqarit'-mut atatillugu Børge Jacksonimik assiliisuminik Brianimik Nunatsinni angalasumik pilersitsisuuvoq.
Pipaluk K. Jørgensen suliffeqarfiutaalu Karitas Production suliamik annertunerusumik maanna naammassisaqarput, ”The Ravens Storm”. Canadami Alaskamilu indianerit naggueqattittalu akornanni kulturikkut anersaakkullu angalaneq, indianerit inuillu kulturiisa assigiinngitsut kattussuunneqarnissaannik siunertaqartoq. Tamannalu maanna piviusulersaarusiaralugu filmiliarineqarnera naammassineqarpoq.
Karitas Productionip piviusulersaarut ukiuni marlunni suliarisimavaa, ullumikkullu tallimanngornermi maajip 17-iani takuteqqaarneqassaaq.
Suliniut Kalaallit, First Nationip Canadamilu Inuit suleqatigiinnerisigut piviusunngortinneqarpoq.
Piviusulersaarutip takuteqqaarneqarnera unnuk naallugu aaqqissuussinertut ingerlanneqassaaq, ilaatigut oqalugiartoqassalluni Nina Kreutzmann Jørgensenilu aamma Mike Thomsen nipilersussapput minnerunngitsumillu Northern Cree POW POW, piviusulersaarutip takuteqqaarneqarnissaanut peqataajartorlutik Canadamit tikissimasut aliikkusersuissallutik.
-Isiginnaartitsisartut sisamat Ontariomut, Nunavimmut Nunavummullu juulip qaammataani 2011-mi qaammatini marlunni angalapput, qitilluni isiginnaartitsissut “Tulugaq” isiginnaartitsissullu “Oqarit Inuullutillu” isiginnaartitsissutigiartorlugit. Angalanerminni naggueqatiminnik naapitsipput, tamarmillu kulturikkut misigisaqarfigilluarpaat. Angalaneq Najattaajaqqamut immikkut ittuuvoq, ukiorpassuarnimi kiinarpaqarluni inuusimanini anigorniarlugu ilungersorsimavoq, Pipaluk K. Jørgensen oqarpoq.
Piviusulersaarutip takuteqqaarnerata kingorna nunani tamalaani filminik festivalinut siammarterneqarnissaa pilersaarutaavoq, ilaatigut Canadami Torontomi ImagiNATIVE-mut kiisalu Chicago International Social Change Film Festivalimut. Festivalit allat aamma isumaqatigiissuteqarfigineqareersimapput, allallu ilaatigut Alaskamiittut ataaserlu Chilemiittoq oqaloqatigineqarsimallutik.
Piviusulersaarutip takuteqqaarnera Katuami ullumi maajip 17-iani nal. 18.30-mit aallartissaaq nal. 23.00-ilu naammassissalluni.
Filmimut pilerisaarut uani takuuk.
