Rasmus Lyberth savalimmiormiunik tulleertulerluni

Taamaammat Nunani Atlantikup Avannaamiunut juullimut siullerpaamik ippassaq tusarnaartitsisoqarpoq. Tamanna pivoq Odensemi oqaluffimmi, Graabrødre Klosterkirkemi. Kalaallillu illuutaanni sulisup, Annette Lyberthip, oqarnera naapertorlugu, tusarnaariarpassuupput, oqaluffik ulikkaavillugu, tassa 200-nit amerlanerit tusarnaariarsimallutik.

- Juullimut tusarnaartitsineq nuanneqaaq, inuit pisarnertut imminnut qanilaarput, naammagisimaarinneqaagullu, Annette Lyberth oqarpoq.

Savalimmiormiut/islandimiullu erinarsoqatigiit Mpiri tusarnaartitsinermi erinarsorput, soorunalumi aamma Rasmus Lyberth.

Kulturikkullu Odensemi siunissami suleqatigiilernissaq eqqarsaatigineqartoq erserpoq, erinarsoqatigiit oqaatsit assigiinngitsut atorlugit tusarnaartitsimmata, spaniamiusut, russisut, savalimmiusut islandimiusullu.

Tusarnaartitsineq naggaserlugu Rasmus Lyberthip Mpirikkullu ataatsimoorlutik tussiut tusarneqisoq atorpaat, tassa Guutiga illimmi.

Nunat Atlantikup Avannaamiunut Odensemi Umiarsualivimmi illuliassaq 2012-imi sananeqarluni aallartissaaq. Entreprenørit katillugit tallimat illup sananissaanut maanna unammipput.

Kikkut sanaartussanersut januaarimi aalajangerneqassaaq.