Rasmus Lyberth nipilersortartumut nersornaasiuttakkamut innersuunneqartoq
Erinarsortartup ilisimaneqarluartup Rasmus Lyberthip nuusiaa "Inuunerup oqarfigaanga/Livet skal leves på ny", Nunat Avannarliit siunnersuisoqartigiivisa nipilersortartumut nersornaasiuttagaanut ukioq manna 2020-mi innersuunneqarpoq. Nuusiaq siorna saqqummersinneqarpoq.
Rasmus Lyberth siullermik 1974-imi saqqummersitsivoq, "Erningaa" tassani saqqummersikkamiuk. Kingorna nuussiarpassuaqarpoq, nunatsinni nunanilu allani ilisimaneqarlualerluni.
Saqqummersitseqqaaramili ukiut 46-nngoreeraluartut ukioq manna suli ingerlalluarpoq, Nunallu Avannarliit Siunnersuisoqatigiivisa nipilersortartumut nersornaasiuttagaanut tassa innersuunneqarluni.
Nersornaasiineq Reykjavikimi oktobarip 27-ani pissaaq
Nuuteeraq "Inuunerup oqarfigaanga" nuusiaavoq pikkunarluinnartoq, taalliortutut, erinarsortartutut, isiginnaartitsisartutut aliikkusersuisartutullu sulinerata sakkortunerpaaffiuleruttorfiani saqqummersinneqarluni.
Nunat Avannarliit Siunnersuisoqatigiivisa Rasmus Lyberthip nersornaaserneqarnissaanut innersuussinerminni taama ilaatigut allapput.
AAMMA ATUARUK Lyberth optræder i færøsk opsætning af dansk dogmefilm
Nunat Avannarliit Siunnersuisoqatigiivisa nipilersortartumut nersornaasiuttagaat, Nunat Avannarliit Siunnersuisoqatigiivisa Reykjavikimi ataatsimeersuarneranni ukioq manna oktobarip ulluisa 27-anni saqqummiunneqassaaq.
Nersornaaserneqartoq nersornaammik "Nordlys"-imik taaguuteqartumik tunineqassaaq, nersornaallu 350.000 koruuninik aningaasartaqarluni.