Nappaatit uumasunit aallaavillit amerliartuinnarsinnaanerat aarlerisaarutigineqartoq

Nappaat Covid-19 nappaatit uumasunit aallaavillit kingulliit ilagaat. Nappaatinik tuniluuttunik allanik takkuttoqarsinnaavoq, nunarsuarmi tamarmi oqartussaasut nappaatinik uumasunit inunnut tuniluuttartut pinngitsoortinniarlugit iliuuseqanngippata.

Taama nalunaaruteqartoqarpoq, Naalaagaaffiit Peqatigiit nalunaarusiaanni, tassani naappaatinik tuniluuttunik uumaasuneersunit takkuttoqaqqissinnaanera aarlerisaarutigineqarluni.

Nalunaarusiami nutaanik nappaateqalertarnernut ilisarnaataasartut arfineq marluk erseqqissarneqarput. Neqitorneruneq, naatitanik atuineruneq, uumasunik nujuartartorneruneq silallu pissusaata allangoriartornera patsisaasutut oqaatigineqarlutik.

- Uumasunik nujuartanik atornerluiinnarutta pinngortitamilu pissuseqatigiinneq aserorterniinnarutigu, nappaatit uumasunit inunnut tuniluuttartut ukiuni tulliuttuni amerliartuinnarsinnaasut ilisimatuussutsikkut ilisimaneqarpoq, Inger Andersen Naalagaaffiit Peqatigiit avatangiisinut suliniutaani Unepimi pisortaq taama oqarpoq.

AAMMA ATUARUK Nappaat ebola DRCongomi tuniluutileqqittoq

Ebola, zika, mers aamma sars taakkuupput nappaatit uumasunit inunnut tuniluussimasut. Unepimit oqaatigineqartoq naapertorlugu, Covid-19 imangertanit aallaaveqarsorineqarpoq.

- Nunarsuarmi Covid-19-imik nappaalasoqalernera inuppassuarnit tupaallaatigineqarpoq, uagulli uumasut nappaataannut tunngasunik suliaqartuusugut tupaallanngilagut. Covid-19-imik nappaalanerup piumaartoq siumut nalunaanngereersimaqisoq, Unepilu nalunaarusiortoq nunat tamalaat nunaateqarnermik nersutaatinillu misissuisarfianneersoq (Ilri) Delia Randolph oqarpoq.

Delia Randolphip Ilrimeersup oqarnera naapertorlugu nappaatit nutaat 75 procentii uumasut silarsuaannit aallaveqarput. Nappaatit uumasuniit inunnut tuniluuttartut 1930-kkunni tusarsaasalerput.