Randi Broberg: Naqisimaneqarnermik misigisimaneq qallunaaluarnerunngilaq
Naaja Nathanielsen tusagassiutinut nalunaarummini ilaatigut ima allappoq, issuaaneq. 'Ammip qalipaataa pillugu assigiinngisitsisarneq ima ersersinneqartalerpoq: Aqqusinertigut ingerlaartilluni appisaluunneqartarnikkut, bussini ilaatilluni, kaffisoriartilluni, facebookimi, suliffinni, nutaarsiassaqartitsivinni tassami sumi tamani'. Issuaaneq naavoq.
Partii Inuit siulittaasuata tullia, Randi Broberg tusagassiutinut nalunaarummini allappoq tamanna aallaaveqarmat, kalaallit kalaallisuinnaq oqaluttut Nunatsinni immikkoortinneqartutut misigisimanerisa tamanna pilersittarimmassuk, nangillunilu ima allalluni, issuaaneq. 'Uanga tupinnartutut isiginngilara, inuk kinaluunniit nammineq nunamini pinngorfimmini, siulimi nunaanni, saarnguvissaminilu ataqqineqanngitsutut paasineqanngitsutullu misigisoq kamassaqassappat', issuaaneq naavoq.
Randi Broberg radioaviisimit attavigigatsinni ima oqarpoq.
- Isumaqarpunga inuiaat kikkulluunniit nunasiaataasimasut tupinnanngitsumik kamassaqartartut. Tamannalu suliarineqarsimanngikkuni, soorlu Nunatsinni taamaattoq, taava inuiaat akornanni akerartuinertut ersissinneqarpoq, soorlu tamanna maanna misigigipput. Kamassaqarneq qallunaaluarnermut saatinneqarpoq maanna, Randi Broberg oqarpoq imalu nangilluni.
- Kamammik ilumiullit 'allanit' paasineqartariaqarput, sooq taama qisuariartarnersut. Uanga nammineerlunga tupiginngilara kalaallit qallunaanut imaluunniit kalaallinut qallunaatuinnaq oqaluttunut taama qisuariartarneri. Taamaaliortarneq aatsaat misigilinngilarput, ukiorpassuarni tamanna misigiuartarparput, maannaliuna oqaluuserineqalerami inuiaat akornanni malunnarnerulertuusisoq.
Randi Broberg aamma allappoq, kalaallit naqisimaneqarnertik eqqartorlugu aallartikkaangata, ammip qalipaataanik immikkoortitsisutut oqaatigineqartarmata, sumik ajortuliortorsuartut isigineqalerlutik. Nangillunilu allalluni, killiffik tamanna tujorminaraluartoq alianaraluartorlu maanna angusimagipput, sorsuutigisarli pillugu tamanna allaqqunneqarsinnaanngitsoq allalluni.
- Kalaallit atorfissaqartinneqarlutillu ataqqineqalinngikkunik misigilernavianngillat. Kamassaqartuassapput. Ataqqineqarnissaq uanga ujartorpara, qallunaaluarnermulli sangutinneqartartoq paasisinnaagaluarlugu oqartariaqarpunga ilumoortumik taamaanngikkaluarmat.
Partii Inuit siulittaasuata tullia, Randi Broberg naggataatigut aamma oqarpoq, annernartut aqqusaaqqaarallassagivut saammaasseqatigiinnissaq angutserlugu.
