Ramasjangimit Motor Mille juullimut ammartakkami nutaami nunatsinnut tunngasumi ilaasoq
Marlunngorneq decembarip aallaqqaataanni WWF-ip juullimut ammartagaliaanit nutaamit ’På eventyr i vilde Grønland’ tassa ’Kalaallit Nunaanni misigisassarsiornermit’ immikkoortoq siulleq aallakaatinneqassaaq.
Ammartagaq WWF-ip danskisut nittartagaatigut, meeqqanut immikkoortukkut, Pandaclubikkut saqqummertassaaq.
Decembarip ingerlanerani tassa meeqqat atuarneranni ullut tamarmik decembarip aallaqqaataaniit decembarip ulluisa 22-ata tungaanut immikkoortoq nutaaq Mille Gorimit nunarsuaq tamakkerlugu pinngortitaq pillugu suliniaqatigiiffimmit saqqummersinneqartassaaq.
Mille Gori aamma Motor Milletut Danmarks Radiop meeqqanut aallakaatitassiaanit, Ramasjangimit ilisimaneqartoq nunarsuaq tamakkerlugu pinngortitaq pillugu suliniaqatigiiffillu WWF isumaqatigiissuteqarput.
Mille Gori juullimut ammartakkamut immiussiartorluni aasaq manna nunatsinniippoq.
WWF-ip oqarnera naapertorlugu juullimut ammartakkap danskit meeqqat atuarfiini atuartut pinngortitamik qanoq paarsilluarsinnaanerannik ilinniartissavai. Kalaallit Nunaallu aallartiffissatut pitsaasuusoq, Mille Gori oqarpoq.
Nunarsuaq tamakkerlugu pinngortitaq pillugu suliniaqatigiiffik tusagassiuutinut nalunaarummi allappoq.
Silap pissusiata allanngoriartornera meeqqat paasisinnaasaanik
- Uanga isumaga malillugu Kalaallit Nunaanni pinngortitaq nunarsuarmi kusanarnerpaat ilagaat. Silallu allanngoriartornera pillugu meeqqat paasisinnaasaannik oqaluuserinninniaraanni aallartiffissatsialaavoq.
- Silap pissusiata allanngoriartornera suunersoq tamannalu nunarsuatsinnut qanoq sunniuteqarnersoq takusinnaasaqarnani paasiniassallugu ajornakusoorsinnaavoq. Kalaallit Nunaata pinngortitaata tamanna oqaasertalersinneqarnissaa ajornannginnerungaalersippaa aamma silap pissusiata allanngoriartorneranut assitaliisitsisinnaalluni, pissutigalugu sermeq isit saanni qanoq aakkiartornersoq takuneqarsinnaalluarpoq, Mille Gori tusagassiuutinut nalunaarummi allappoq.
Juullimut ammartagaq nittartakkakkut pissarsiarineqarsinnaavoq, taannalu meeqqat atuarfianni atuartitsinermut aamma atorneqarsinnaalluni, nunarsuaq tamakkerlugu pinngortitaq pillugu suliniaqatigiiffik allappoq.
- Tamatta pinngortitaq silallu pissusia pillugu iliuuseqarsinnaavugut, eqqarsaatigiullu meeeqqanik pinngortitamik paarinninnissamut suliniuteqarnissamik kissaateqartunik pilersitsisinnaagutta. Taamaammat Mille Gorip ikiuineratigut oqariartuutip pingaaruteqartup ersersissinnaanera nuannaarutigingaatsiarparput, nunarsuaq tamakkerlugu pinngortitaq pillugu suliniaqatigiiffimmit, WWF Danmarkimi generalsekretær, Bo Øksnebjerg oqarpoq.
