RAL umiartortunik nunanik allaneersunik sulisoqalersinnaanissani misissuiffigaa

Royal Arctic Linemi siulersuisut aqutsisunut sapaatip-akunneri marluk matuma siornatigut suliakkiutaat erseqqippoq, 10 million koruuninik sipaartoqassasoq aningaasallu suliffeqarfimmit tiguneqassapput. Aqutsisut suut tamaasa nalilersorlugit aallartereerpaat, ulluinnarni aqutsineq sipaarfigineqassaaq, aserfallatsaaligassat nalilersoqqinneqassapput, atorfiit inueruttut inuttassarsiuteqqissanerlugit nalilersorneqartalerput kiisalu it atorlugu suliniutit nalersoqqinneqarlutik.
 
- Assartuinermi aningaasartuutit matuneqassappata 5 procentimik qaffaaneq naammanngilaq, assartuineq sullissinitsinnut naleqqiullugu akisuneruvoq, Royal Arctic Linemi attaveqaqatigiinnermut tuniniaanermullu immikkoortortami pisortaq Jakob Strøm oqarpoq.
 
Umiarsuarni assartuutini sulisut stewardesset, hovmesterit skibsassistentillu 50-it missaanniittut nunanit allaninngaanneersunik, soorlu filippinerinik taarserneqarsinnaanerat aamma misissorneqarpoq, filippinerit akikinnerussappata periarfissaasinnaasutut isigalugit.
 
- Tamanna suli aalajangiiffigineqanngilaq. Ilumut taamaaliussanerluta apeqquterujussuuvoq aamma taamaaliussagutta aningaasartuuteqartussaassaagut. Filippinerit aningaasarsiakinnerupput, sulisooreersulli taarserniarnerat akeqassaaq. Taamaaliussagutta akilersinnaassanersoq apeqqutaavoq, suli misissuiffigalugu naammassinngilarput, jakob Strøm nassuiaavoq.
 
Jakob Strøm aperaarput akinik 10 procentimik qaffaarusunnertik angunnginnamikku piginnittunut qunusaariinnannginnersut imalu akivoq:
 
- Qunusaarinngilavut, 10 procentimilli qaffaanissamik qinnuteqaaterput tamakkiisumik iluatsinnikuunngilarput. Affaannai angunikuuagut, allatullu ajornartumik suliffeqarfitta iluani sipaarfiusinnaasunik misissuisariaqarpugut. Sapaatip-akunneri tamaasa assartuisussaatitaaneq akisoorujussuuvoq aningaasartuutivullu akilersinnaasariaqarpavut, Jakob Strøm erseqqissaavoq.
 
Royal Arctic Line sipaarfiusinnaasut pillugit piginnittunut, tassalu Namminersorlutik Oqartussanut oktobarimi saqqummiussissaaq.