RAL-ip siulittaasua: Isumaqatigiissut toqqissiallannarpoq
Isumaqatigiissutip sivitsornissaanut pitsaanerusumik akikinnerusumillu ingerlatsisinnaanerput pisariaqartutut eqqarsaatigalugu, Royal Arctic Linep siulersuisuini siulittaasoq, Martha Labansen, oqarpoq.
Royal Arctic Linep Aalborg Havnimik isumaqatigiissutaa 2007-imeersoq 2017-ip tungaanut atuukkaluarpoq. Nutaamilli isumaqatigiissusiornissaq 2008-mili anguniarneqalerpoq, Royal Arctic Line-p Aalborgimi atukkani, siulittaasup oqarneratut, naammaginartinngimagit.
Isumaqatigiissut illuatungeriinnut pisussaaffiliimmat, Aalborg Havn aamma pilliuteqassaaq. Taanna quersuarmik 5.200 m2-isut angitigisumik, peqqumaasivimmik 4000 m2-isut angitigisumik taakkununngalu atatillugu Royal Arctic Line-p allaffeqarfissaanik sanaartussaaq, katillugit 250 millioni koruunit missaannik naleqartussanik.
Taakkua 2011-imi piariissasut naatsorsuutigineqarpoq.
Aamma nillataartitsivissuarnik, Royal Arctic Line-p atortagaanik, 2011-miit allilerinissaq isumaqatigiissutigineqarpoq.
- Neriuutigaarput akikillisaanissaq aamma Nunatsinnut akikinnerusumik pitsaanerusumillu sullissinermik kinguneqarumaartoq, Martha Labansen oqarpoq.
Kisianni 2022-ip tungaanut Aalborgimi umiarsualiveqarnissamik isumaqatigiissuteqarnikkut Royal Arctic Line imminut pituttoraluartoq, siulittaasuup erseqqissarpaa, Nunarput Danmarkiunerusumik ukiuni taama amerlatigisuni niueqateqarnissamik pituttunngimmat.
- Nunanit allaniit Nunatsinnut umiarsuakkut assartuineq pisariaqassappat, taanna mattunneqanngilaq. Danmarkimiit Nunatsinnukaatassat 75 procentiisa Aalborgikkut ingerlanneqartarnissaat isumaqatigiissummi pineqarpoq, Martha Labansen naggasiivoq.