RAL-ip assartuinermi ajornartorsiornera namminersortunik aamma eqquivoq

Hotel hvide Falkip piginnittua Tuuta Knudsen KNR-imut taama oqarpoq.

- Assersuutigiinnarsinnaavara aasaq naallugu takornariat tikerarnerisa nalaanni viinnissagut qerisutut nassiussimagamikkit, taava viinnissaqarnata, Ilulissani Hotel Hvide Falkimik piginnittoq Tuuta Knudsen oqarpoq.

Viinninik tikisitassanik allanik akisunaarlugit pisisariaqalersimanertik, taassuma oqaluttuaraa:

- Atorsinnaasatsinnik illoqarfimmi ujarleqattaartariaqarnikuuvugut. Uagutsinnut ajuuissumik. Akisunaarlugulu erloqinartumik atorparput, Hotel Hvide Falkip piginnittua oqarpoq.

Tikisitassat allat assersuutigalugu Nuummut niuneqarsimasut, Tuuta Knudsenip oqaluttuaraa, soorlu naamma naatitat allallu nillataartumiittussat kiattumiitsinneqartarsimasut:

- Nuanniitsorujussuuvoq. Pisiffigut soorunami akilertariaqaratasigit, pisiagut pinngikkaluarlugilluunniit. Nuanniitsumik misiginarpoq, Tuuta Knudsen oqarpoq.

Aasaq akisunaarpaat

Hotel Hvide Falkip Royal Arctic Linep assartuinermi ajornartorsiornerata malitsigisaanik aasaq manna akisunaarpaa, taarsiivigineqarnissartillu taamaammat pingaaruteqartoq, Hotel Hvide Falkip piginnittuata oqaatigaa:

- Soorunami pingaaruteqartorujussuuvoq. Aasakkut takornariaqartarnera inuuniutigaarput, taamaammat pingaaruteqartorujussuuvoq ulapaarfiup nalaani suna tamarmi ajunngitsumik ingerlanissaa. Taamaatttumik taarsiiffigineqarnissarput pingaaruteqartorujussuuvoq,
Ilulissani Hotel Hvide Falkip piginnittua Tuuta Knudsen oqarpoq.

Royal Arctic Linep pisortaanerata Verner Hammekenip, KNR-imut mailikkut allagaqaateqarluni oqaatigaa Royal Arctic Line pitsaassutsimik ataasinngornerit tamaasa suli uuttortaasartoq, tamannalu pillugu aggustip naajartulernerani aatsaat oqaaseqarsinnaanissartik ilimagalugu.