RAL-ip Aalborgimiikkunnaanera inuussutissarsiornermik eqquisinnaavoq
Tamannalu Aalborgimi Kalaallit Illuutaanni pisortap ernumanartoqartippaa.
- Soorlu ullut qaangiuttut. Royal Arctic Linep Aalborgimi umiarsualivik 2019-imiit atorunnaassanerareernerata kingorna kalaallit Illuanni Aalborgimi pisortaq Søren Stach Nielsen taama oqarpoq.
Umiarsuaatileqatigiiffimmi Kalaallit Nunaata Danmarkimut pingaartumik Jyllandip avannaanut attaveqaateqarneranut ilisarsaataasutut inissisimagaluarpoq.
- Aalborgip umiarsualivittut pingaarnertut ukiorpassuarni atorneqarnera Aalborgimi Kalaallit Illuutaannut sunniuteqartupilussuusimavoq. Kalaallit Illuata suleqatigiinnikkut atassuteqarfigisaanit tutsuigineqarnermik nassataqarmat.
Aamma atuaruk Aalborgip umiarsualiviata Royal Arctic Line tatiniarsarigaa
Royal Arctic Linep 2019-ip kingorna Aalborgip Umiarsualivianik atuiniarunnaarnerata tusarliunneqareersoq Aalborgimi Kalaallit Illuutaanni pisortaq, Søren Stach, taama oqarpoq.
Pisortaq naapertorlugu RAL-ip Aalborgimut ukiuni 45-ini isumaqatigiissuteqarsimanera isumaqarsimavoq, jyllandip avannaani najugallit Kalaallit Nunaannut kalaallinullu attaveqarnerannik qaninnerulersitsisimasoq.
Inuussutissarsiornermut ernumanartoqartippaa
Aalborgimi kalaallit illuutaa pingaarnernik sisamanik pilersaaruteqarpoq, taakkunanngalu ataaseq inuussutissarsiuteqarnerup nunatta Danmarkillu akornanni ineriartornissaanut tunngassuteqarpoq.
Tamannalu pillugu Aalborgimi kalaallit illuutaata ukiorpassuarni inuussutissarsiutaarniarfini Aalborgip avannaaniit Aalborg Centrumimut illorsuarmut allanik inuussutissarsiornermut ilinniarnermullu attaveqartut Arctic Consensusip, Arctic Business Networkip, Arctic Education Networkip AAU Arcticillu inissisimaffigisaannut upernaaq nuutsippaa.
Aamma atuaruk RAL: Nalunngilarput Aalborgip umiarsualivianut tusarluarnerunngitsoq
Taamaammallu Royal Arctic Line Aalborgimiikkunnaarpat Kalaallit Illuutaata inuussutissarsiornerup iluani iliuusissatut pilersaarutini qanoq pissanerlugit isumaliutigisariaqassavaa.
- Taannartaa ernumanartoqartilaarpara. Imaassinnaavoq inuussutissarsiummut tassunga atatillugu ajornarnerulaalersoq.
Ikinngutigiinnermik isumaqatigiissuteqarneq suli upperaa
Aalborgilli Kommuniata Kommuneqarfik Sermersuullu suleqatigiinnissamik isumaqatigiissuteqarnerat Søren Stachip eqqissiallannartoqartippaa.
RAL-illi nutarsaanikkut Aalborgimit peernerani tamanna allannguuteqarnissaa ilimaginngilaa. Kalaallimmi 2.300-ut Jyllandip avannaani najugaqarput, taakkunannga 1.300-ut missaat Aalborgip Kommuniani najugaqartuupput, taakku pillugit illuatungeriit isumaqatigiissuteqartik attatiinnassagaat, Søren Stach Nielsen isumaqarpoq.
- Takorlooruminaatsippara. Suleqatigiinnissamik isumaqatigiissut kommuninut marluusunut iluaqutissartaqartitsivoq. Taamaammat ingerlaannarnissaa ilimagaara.
RAL-ip Aalborgimi sulisuisa 2019-imiit suliffitsit annaasinnaagaluaraat, Søren Stach Nielsen isumaqarpoq kommunimut isumaqatigiissuteqarnerup ilaatigut ilinniarnermut atatillugu suliffimmiinnissat qulakkeersinnaassagai.
Kalaallit 1300-t, taakku ilarparsui ilinniagaqartuullutik, Aalborgimi najugaqarput. Royal Arctic Linelu taakkununnga ullumikkut sunniuteqaraluartoq Aalborgip Kommunia innuttaasumi isumaginissaanut pisussaaffeqarpoq.
- Soorunami sungiusaatigalugu ilinniarfissanut tunngatillugu periarfissanik annaasaqarfiussaaq. Sermersuulli Aalborgillu isumaqatigiissutaat sungiusaatigalugu suliffissanik suliffissanillu allanik pilersitsinissamik siunertaqarpoq. Taamaammat ilinniagaqartunut sunniuteqarujussuarnissaa takorloorsinnaanngilara.
