RAL-ermiut pissangallutik utaqqipput

- Soorunami qilanaarutigivarput Naalakkersuisut maajip 21-ata kingorna avammut nalunaaruteqarnissaat, Jakob Strøm, Royal Arctic Linemi tugassiisartut pisortaat oqarpoq.

Royal Arctic Line siorna Naalakkersuisuusunit Nuummi umiarsualiviup 600 million koruunit sinnerlugit naleqartussamik allinerneqarujussuarnissaanik ilisimatinneqarput.

Pilersaarutillu ima ingerlallualereersimatigipput, Sanaartornermut Naalakkersuisuusimasumit, Jens B. Frederiksenimit oqaluttuarineqarluni umiarsualivik 2016-mi piareersimanissaa naatsorsuutigisinnaagipput.

Maannali Naalakkersuisunngortup, Steen Lyngep, Naalakkersuisuusimasut umiarsualivimmut pilersaarutigisimasaat attatiinnarneqassanersut neriorsuutigisinnaanngilaa.

Steen Lyngellu taama oqarnera Royal Arctic Linemut Jakob Strømimullu tupatsitsivoq. Taamaattorli kinguartitsisoqaqqissappat allatut iliuuseqarsinnaanissamut suliffeqarfimmut eqqarsalersitsivoq:

- Apeqqutaalluinnarpoq kinguartitsiniarnerit qanoq sivisutigissanersut. Qanoq iliuuserisinnaasagut assigiinngitsut eqqartoreerpagut. Ukioq ataaseq kinguartitsisoqassappat pilersaarutit allannguallatsinnerannik kinguneqarumaarpoq. Taamaattorli sivisunerusumik utaqqisitsiniarpata imaluunniit sanaartornianngippata, taava allatorluinnaq eqqarsartariaqalissaagut. Tamakkua eqqartoreerpagut, neriuppugulli piviusunngortinnissaat pisariaqassanngitsut, Jakob Strøm oqarpoq.

Naalakkersuisut Nunatsinni sanaartugassanik tulleriiaarinissaminnut pilersaarutertik marlunngorpat saqqummiutissavaat.