RAL 23 millionit koruuninik sinneqartoorpoq
Tamanna umiarsuaatileqatigiit 2009-mut ukiumoortumik naatsorsuutaanni takuneqarsinnaavoq.
Imaatigulli assartuussineq pitsaavallaanngitsumik ingerlasimagaluartoq taamaattoq umiarsuaatileqatigiit 2009-mi akileraarutit ilanngaatigineqannginneranni 23 millionit koruuninik sinneqartooruteqarput. Tassalu ukiumut siulianut naleqqiullugu 13 millionit koruuninik.
Sinneqartoorutit Royal Arctic Linemit nalunaarut naapertorlugu pissuteqarput angallassinermi akit qaffannerannik aningaasartuutikinnerunermillu. Tamannalu umiarsuaatileqatigiit piginnittuisa, tassa Naalakkersuisut, nuannaraat:
- Naalakkersuisut paasivaat, ingerlatseqatigiiffik naak isertitani ikiliartoraluartut peqatigisaanik aningaasartuutinik ikinnerpaanngortitsinissani pikkoriffigisimammagu taamaattumillu pitsaasumik angusaqarluni. Tamanna naammaginartutut isigisariaqarpoq, Steffen Ulrich-Lynge, attaveqarnermut naalakkersuisoqarfimmi pisortaq tusagassiorfinnut nalunaarummi taama oqarpoq.
Royal Arctic Linep siunissamut pilersaarut nutaaq atulerpaa, aningaasaqarnikkut ajalusoornermi umiarsuaatileqatigiinnik nukittorsaasussaq. Aningaasarsiorfiusinnaasut nutaat eqqarsaatigineqassapput, taamaattumillu umiarsuaatileqatigiit Danbor Service peqatigalugu ingerlatseqatigiiffik nutaaq "Arctic Base Supply", uuliasiornermi kiffartuussiviusussaq, pilersillugu.