Meeraalluni Kalaallit Nunaanniippoq takusinnaasimanaguli: Radioavisimik tusarnaartartut aalajaannersaattut ullumikkut taaneqarsinnaagunavippoq

Allan Gravesen Radioavisimik naalaartartutta aalajaannersarigunavippaat.

Aaqqissuisoqarfimmimi Allan Gravesen ilisimaneqarluarpoq. Inuttut qanimuunngitsoq. Kisianni mailinik nassiussillattaartarneratigut, nassiussai tassaasinnaapput uparuaatit nersualaarinnerillu, asannittumik inuulluaqqusinerit imaluunniit kajumissaarutit - soorlu:

- Mikrofonip nipaa sakkukippallaarpoq, aallakaatitaq tamarmi nipikillisarlunilu nipittoqattaarpoq.

Radioavisimi tusagassiortoq nutaaq ukiaq aallartimmat:

- Nal. 14. nutaarsiassanik atuaanerit ajunngeqaaq!

Imaluunniit tusagassiortoq nuffasersimasoq atuaasoq asannittumik inuulluaqqummagu:

- Toqqusaarissipallanniarinatoq, Allan Gravesen aallakaatitaq naaginnartoq allappoq.

Allan Gravesen 51-inik ukiulik tappiitsuuvoq nukillaarnermillu nappaateqarluni. Nunarsuarmi pisut nipit, qaamaneq aamma maluginiutit allat atorlugit paasisinnaavai. Soorlu KNR Radioavisi, Klintholm Havnimi Mønimiittumi angerlarsimatilluni ullormut tusarnaaraangamiuk.

Nuannariinnarlugumi malinnaasuunngilaq. Tassami Kalaallit Nunaannit nutaarsiassat tassaapput ilaquttaminut Arsummiittunut attaveqaatai pingaarluinnartut.

- Ilaquttammi qanoq atugaqarnerat malinnaaffigerusuppara. Ilaquttat ilaannni oqaloqatigisarpakka Kalaallit Nunaannilu ulluinnarni inuuneq malinnaaffigalugu, Allan Gravesen oqarpoq.

Ilaginagu ilaqutai Kalaallit Nunaannut aallartut

Allan Gravesenip arnaa Arsummi, Grønnedalip eqqaaniittumi 1953-imi inunngorpoq, 21-nillu qaammateqarluni Danmarkimi meerarsianngorluni. Inersimasunngorami Allan Gravesenip angutaa naapippaa.

Pingasunik qitornaqalerput, taakkulu ilagaat Allan Gravesen. Allan Gravesen qaammatinik marlunnik inorluni inunngortoq, kuvøsemut - naalungiarsummik kissassimaartitsivimmut ulilikkamut - ikineqartoq, iltilersorneqarpallaarniniluni pillugu tappiitsunngorpoq. Inorlunilu inunngornini pillugu qaratsamit pisumik timaa nukullaangasuuvoq, taamaammallu qamutini assakaasullit ulluinnarni atunngitsoorsinnaanagit.

Allan Gravesenip angajoqqaavi qatanngutaalu Arsummut 1981-imi nuupput, tassani Allan Gravesenip angutaa aalisakkanik tunisassiorfimmi ingerlatsisunngormat arnaalu tunisassiorfimmi allaffimmiunngormat.

Taamani Allani qulingiluanik ukioqartoq nunami qaarsortaqaqisumi qamutini kaassuartakkaniittoq ilaanngilaq, Danmarkimiiginnarpoq. Isiginiarnerminnik ajoqutillit atuarfiannut - Refnæsskolemut - Synscenter Refsnæs-imik maanna taaguuteqartumut – tappiitsut atuarfiannut Kalundborgip kangerluaniittumut inissinneqarpoq.

- Angajoqqaakka Kalaallit Nunaanniipput 1981-imiit 1986-imut, juullimi aasakkullu taamaallaat takusarpakka. Innarluutillit Kalaallit Nunaanni taamani isumagineqartarnngillat. Namminersornerullutik Oqartussat taamani akissaqaratillu periarfissaqannginnamik, Allan Gravesen oqarpoq.

”Qujanartumik” ilaquttami aallarnerat eqqaamasaqarfiginagu oqaatigaa.

- Taamaassimasuuppammi sequmivissimaqqajaqaanga. Artornarsimassagaluarpoq. Isumaqarpungalu, inuuniarusuummerlunga aallarnerat puigorsimassallugu, oqarpoq.

Qamuteralanneq radioavisilu nipitaliullugit

Kisianni Kalaallit Nunaanniittarnini eqqaamaqai, nuannaarnertaqaqisut, kisianni aamma nuannerpallaanngitsortallit. Nuannerpalllaanngitsortai tassaanerarpat arlaanut nikissaguni allat ikiuisariaqartarnerat, soorlu anissaguni kivinneqarluni ikiortariaqarpoq imaluunniit allanit orninneqartariaqartarluni. Ilaannili qamuteralammik angallanneqartarpoq.

- Qamuteralalluni assut nuannerpoq. Angaarma snescootererluni aasarpaanga. Qaarsortatigut ingerlaniarneq  pingaartumik taamanikkut qamutit assakaasullit piusut eqqarsaatigalugit, ajornartaqigami. Danmarkimummi uterninni qamutikka aserorsimasarput, Allan Gravesen oqarpoq.

Illup iluani KNR aliikkutarilluartarpaa, kingumummi qiviaraangami Allan Gravesenip inuunini naallugu radio tusarnaartuagaraa.

- Radiomi oqaatsit atorneqartut tamaasa paasisinnaanngikkaluarlugit tusarnaartarpara. Kalaallisut maanna paasinnissinnaanerulaalernikuuvunga, naalaagariuarakkumi, oqarpoq.

Kalaallit Nunaaniittarnerminili maluginiarnerpaasaa tassaavoq, peqataatitaasutut misigisarneq.

Utertitseriaaseq, namminersorneq aamma kalaallisut oqaatsit

Angajoqqaani qatanngutinilu Danmarkimut utereermata, Allan Gravesen kingorna nammineq 18-inik ukioqarluni paarsisoqarluni Kalaallit Nunaanniippoq.

Kingorna Arsummiittut ilaquttani oqarasuaatikkut Facebookikkullu attaveqarfigiuarpai. Naallu ulloq unnuarlu ikiorteqarnissani atortorissaaruterpassuillu pisariaqartittaraluarlugit – soorlu qarasaasiaq allatanik nipituumik atuaasinnaasoq – Radioavisi tassaavoq nittartagaq aqqutigalugu nammineq tusarnaartagannaavisa ilaat.

Tusakkanilu assut soqutigalugit isummersorfigisarpai. 

Soorlu puiaasanik, qillertuusanik allanillu imeruersaatinut puunik utertitseriaasissamik assortuussut. Brugseni aamma Pisiffik Namminersorlutik Oqartussanit utertitseriaasissamik januaarip aallaqqaataani 2024-mi namminneq aallartitsinatik kingusinnerusukkut aallartitsinissaminnik immikkut ittumik akuerineqarnissaminnik qinnuteqaataat akuerineqanngitsoq. Aalajangiineq sianiitsuliorneruvoq, Allan Gravesen oqarpoq:

- Uanga innarluuteqartuuvunga. Kalaallit aamma utertitassanik utertitsisinnaanngikkunik taama misigissapput, . Taava pinngortitamut eqqaannarneqassapput. Tamannalu pinngitsoortittariaqarpoq, oqarpoq.

Kalaallit Nunaata namminiilivinnissaminut naalagaaffinngoriartuaarnermini aqqutaa aamma malinnaavigaa, tamannalu aningaasaqarneruleriartornerup malitsigissagaa, Allan Gravesen isumaqarpoq.

- Nalunngilara, politikkimik oqallinnermut ilannguttariaqanngikkaluarlunga. Kisianni innarluutilittut inuunermi ullut tamaasa assigiinngitsunik unamminartorsiffigisarlugit, oqalliseqataanngitsoorsinnaanngilanga.

Kalaallit Nunaanniinneq misigeqqikkusukkaluaraa

Piumassuseqarnera ajoquteqanngilaq. Kalaallit Nunaammi Allan Gravesenip tikeqqikkusoqaa. Kisianni piviusunngortinniarnera ajornakusuussaqaaq.

Angalanermi akisoqaaq, namminermi innarluutilittut inuunerani atortorissaarutit pisariaqartitai pillugit akisunerussaqaluni. Timmisartoq umiarsuarluunniit immikkut innarluutiminut naleqqussagaq, ikiortillu marluk pingasu - taakkulu angalanerisa akiisa qaavatigut aamma ulloq unnuarlu imminik paarsinertik pillugu akissarsiaqarnissaat - tassa qaavatigut akiligassat.

Kisianni oqarpoq:

- Lottomi eqquissaguma – lottorsimassagumalu – takkutikutsuussaanga.

Tungaanut KNR Radioavisi tusarnaarlugu Kalaallit Nunaaniittuusiinnarumaarluni, Allan Gravesen oqarpoq.

- Tusarnaarlugumi Kalaallit Nunaanniilluni misiginartarpoq, aamma tikeraarsinnaanngikkaluaraanniluunniit.

Allan Gravesenp inuunera Kalaallit Nunaannullu attuumassusaa, uani tusarnaarsinnaavat til udsendelsen "Grønland i Danmark" . Jens Brøndenimit apersorneqarnera februaarip ullluisa  8-ni 2022-mi aallakaatinneqarpoq