KNR Radioaviisit ullormut aallakaatinneqartartut amerlassusiat KNR-ip allanngortippai

Akunnikkuutaartumik nutaarsiassiinermik eqqussisimanerput innuttaasut amerlanerpaartaannit iluarineqarnera naammagisimaarinninnermik misissuinitta takutikkaluaraat, nassuerutigisariaqarparput malinnaaniarneq peqatigisaanillu tusagassiornikkut oqaatsitigullu pitsaassutsip Radioaviisip pigisassaa    attatiinnassallugu ajornakusoorsimasoq. Taamaammat Radioaviseqartitsisarnerit amerlassusaat pinnagit pitsaassuseq pingaarnerutilissavarput, Nutaarsiassaqartitsivimmi pisortaq Mikkel Bjarnø Lund oqarpoq.

Radioaviisip ullut tamaasa ullaaralaamit unnunnissaanut nutaarsiassiisarnini ingerlatiinnassaa, soorlu aamma sapaatit akunnerata naanerini sapaatinilu tamani radioaviiseqartassasoq. Radioaviisi siunissami ullaakkut nal. 7, 8 aamma 9 aallakaatinneqartalissaaq. Ullormullu aallakaatitsineq pingaarneq, ullup qeqqanut radioaviisi, minutsinik 15-inik sivisussuseqassalluni. Ualikkut nal. 14 aamma 16 nutaarsiassiisoqartassaaq Radioaviisillu ullormut aallakaatitai nal. 18 naggaserneqassapput. Sapaatit akunnerata naanerini sapaatinilu Radioaviisit marluusarnerat allanngortinneqassanngilaq siunissamili nal. 14 aamma 18 aallakaatinneqartassallutik. Radioaviisip kalaallisut aallakaateqqaartarnera kingornalu danskisut aallakaatinneqartarnera taamaaginnassaaq.

Nutaamik aallakaatitsinermut pilersaaruteqalerneq suliarisartakkatta ikilisinneqarnissaattut paasineqassanngilaq.  Sulisorisavut, anguniakkatta pitsaassutsillu Radioaviisip ilisarnaatigisassaatut kissaatigisatta pitsaanerusumik oqimaaqatigiissinniarlugit taama iliorpugut. Isorinnittumik pitsaasumillu nutaarsiassatigut tusagassiorneq siuttuuffigerusupparput, tamannalu nutaamik pilersaaruteqalernitsigut angusinnaanerulissavarput, Mikkel Bjarnø Lund oqarpoq.

Aallakaatitsinermut pilersaarut nutaaq ataasinngornermi aggustip 20-ani atuutilissaaq.