Radareqarani angallassineq misissuiffigineqartussanngorpoq

Disko Line-p ilaasortaateeraa, Amaroq, sumiissusersiornermut atortorissaarutiminik ajutooqqasoq, Qeqertarsuarniit Aasiaat aqqusaarlugit ippassaani Ilulissiartinneqarpoq.

Angalanera ippassaq oqaluttuarisarput ajorluinnartumik kinguneqangajappoq. Ilaasortaateerarmi anorlerluni nittaaleruttortoq ikkarluit akornannut pigaluarpoq. Ilaasulli oqarasuaataata angallattakkap GPS-ia atorlugu ilaasortaateeraq Ilimanut apuutsinneqarpoq.

Ilaasortaateeqqalli radariiaqqallunili angallassinera inatsisinik unioqqutitsinerunersoq Søfartsstyrelsemi angallatinik nakkutilliisup Hans Fleischerip imaaliallaannaq oqaatigineqarsinnaanngilaa:

-Naluara qanoq pisoqarsimanersoq suli iluamik paasissutissanik pinikuunnginnatta. Kisianni aamma tusarfigerusuppagut taakkua ilaasut, taakkualu naammagittaalliorsimasut. Tusarusullugulu sunarpiaq pineqartoq. Aamma misissuinermut tassunga ilaasariaqassangamik, Hans Fleischer oqarpoq, nangillunilu:

- Tassa tamakkua angallatit ilaasoqarsinnaasut aqqaneq marluk tikillugit Søfartsstyrelseminngaanniit akuerisaapput. Kisianni soorlu tassani uani pineqartumi angallatit taakkua radareqarput. Tamatigut radareqartussaapput. Kisiannili aamma allaqqavoq unnukkut angalasassagunik imaluunniit pujortumi silarluttumiluunniit radareqartussaasut, Hans Fleischer oqarpoq.

Taassuma aamma ilanngullugu ilisimatitsissutigaa Disko Line Søfartsstyrelsen-imit piumaffigineqarsimasoq pisoq Ajutoorsimasoqartillugu paasiniaasartunut misissuiffigineqartussanngorlugu nalunaarutigissagaat.

Disko Line-miillumi Ajutoorsimasoqartillugu paasiniaasartunut ullumi nalunaarusiorsimapput:

- Ullumikkut nalunaarusiaq naammassigatsigu nassiupparput. Tassa naliginnaasuuvoq taamatut pisoqartarnera, Frederik Sandgreen, Disko Linep pisortaa oqarpoq.