Politiit mianersoqqusipput: Qummoroortartut tillitat kukkusunik tigummineqarneri navianarsinnaasoq

Tillinneqartut nuannersuinnaanatillu quianartuinnaanngillat. Qaartiterutaappummi aamma navianartut. Nunatsinni politiit tusagassiutit nalunaaruteqarlutik pingasunngornermi ualikkut taama allapput.

- Qummoroortartut taama amerlatigisut aarlerinanngitsumi inissinneqanngikkunik sillimaniarnermut navianaateqarput, politiit allapput.

- Ilisimaqanngitsut qummoroortartunik taama amerlatigisunik tigumminninnerannik qaartoortoqarsinnaanera ikuallattoqarsinnaaneralu aarlerinarpoq. 

Tillinniarneq marlunngornermi unnukkut nalunaaqutaq arfineq marluk pingasunngornerullu ullaavani nalunaaqutaq qulingiluat akornanni pisimasoq, Nuummi katersortarfiup aqutsisuata Gunnar Petersenip pingasunngornerup ulluata ilaani oqaluttuaraa. 

- Marlunngornermi unnukkut taakaniippunga, allanartoqanngilarlu, KNR-imut oqarpoq.

Gunnar Nuummi Qinngorpumiittumut pingasunngornermi ullaakkut containerimukarpoq. Tassani paasivaa karsit ikinnerpaamik hunnorujuk qummoroortartunik imaqartut tillinneqarsimasut, taakkulu 600.000 koruunitut naleqarnerarpai.

Qummoroortartut taakkuninngalu tillinniartut pillugit paasissutissanik Politiit maanna tusarusupput. Politiit iluaqutigisinnaasaannik paasissutissaateqaruit uunga attaveqarsinnaavutit 70 14 48.