Qummoroortartut 700 kiilut Nuussuarmi quimi nassaarineqarput
- Ilumoorpoq qummoroortartut 700 kiilut missaat nassaarigatsigit, Nuussuarmi inissiat akornanni quiit ilaanni toqqortaatigineqartut nassaarigatsigit, Søren Bendtsen, Nuummi politiineersoq KNR-imut ullaaq manna oqarpoq.
Qummoroortartut innuttaasut ilaannit politiinut kalerriutiginnittoqarneratigut nassaarineqarput, qatserisartullu politiillu qummoroortartut isumannaatsumut ippassaq unnukkut nalunaaqutaq qulit missaanni inissippaat.
- Qummoroortartut taama amerlatigisut inissianut taama qanitsigisumi toqqortaatigineqarnerat isumannaallisaaniarnermut malittarisassanik unioqqutitsineruvoq sakkortooq, qummoroortartullu tillinneqartut sinneri ujaarileruttorpavut, taakku isumannaatsumut aamma inissinneqarsinnaaniassammata, Søren Bendtsen oqarpoq.
Politiit suliamut atatillugu pasisaqarput sulili tigusarinnittoqarani.
Nuummi politiit tillinniat qummoroortartullu nassaarinissaannut suli ikioqqupput, takunnissimasinnaasut ilisimannittulluunniit Nuummi politiinut saaffiginneqquneqarlutik. Nuummi politiit oqarasuaataasa normoraat 70 14 48.
