Qulleq angallanneqarsinnaasoq Kalaallit Nunaanni nassaarineqarpoq
Issittumimi Saqqaq-kulturimiut Nunatsinneersut qullermik orsutortumik angallanneqarsinnaasumik ukiup taarnerani inuuniarnermik oqinnerulersitsisumik ukiut 4000-it matuma siorna nassaartuupput.
Danmarkimi katersugaasivissuup ilisimatusarnikkut suliniutaani saqqummiunneqaqqammersumi tamanna paasinarsivoq.
- Naneruutip nassaarineqarneratut sanilliunneqarsinnaavoq, Danmarkip katersugaasivissuani ilisimatusarnikkut professori Bjarne Grønnow qulleq orsutortoq kalaallinit itsarnitsanit Kalaallit Nunaata Kitaani Kristusip inunngornerata ukiunik 1900-nik siornagut nassaarineqartoq, kingornalu Kalaallit Nunaannit Issittup sinnerani atorneqalersoq pillugu taama oqarpoq.
Inuit issittormiut qaammaqqutissamik kiassaatissamillu pissarsisinnaanerat inuuniarnermut taamanersuarli pisariaqarluinnartuusimavoq. Issittumi inuit najugaqartut siullersaat orsumik ikummateqartarsimapput qulliilli angallanneqarsinnaasut ilisimasaqarfigisimanagit.
Saqqaq-kulturimiut ukiuni 500-ni Kalaallit Nunaanni inooreerlutik qaammaqqutertik angallanneqarsinnaasunngortissimavaat, tamannalu Issittumi ikummateqarnerup iluani taamani nutaaliornertut taasariaqarpoq.
- Kalaallit Nunaata kitaani qulliit orsutortut ammalortunngorlugit ukkusissamik sanaat nassaarineqarnerisigut qaammaqqutigineqartoq angerlarsimaffiup iluani silamulluunniit nuunneqarsinnaasunngorpoq, qullerlu aamma ungasissumut angalanermi nassatariuminartuulluni, Bjarne Grønnow oqarpoq.
Qulliit orsutortut sillisissamik ukkusissamilluunniit sananeqartarput. Qulliillu angallanneqarsinnaasut atorneqartarnerat ukiuni hundredelikkuutaani tullerni Canadamut naggueqatigiit inuit akornannut siaruaappoq, ilaatigut allaanerusumik iluseqartillugit sananeqartarsimallutik. Qulliup orsutortup atugaalernera inuit Issittup avannarpasinnerusortaani ukiuni tuusintilinni tulliuttuni inuusinnaasimanerannut pissutaaqataalluinnarsimasoq, Danmarkip katersugaasivissuani ilisimatusartut allaaserisaminni taama allappoq.