Qulimiguulik Qeqertarsuup tunuani silaannakkut angallassinermut oqilisaataasoq
Qeqertarsuup tunuani silaannakkut angallassinermi qulimiguulik ataatsimik ilaneqarmat taanna januaarimni februaarimilu ilaasunik angallassinermut oqilisaataavoq.
Taamaalillunilu ukiup aallartinnerani sila peqqutigalugu angalanissaminnut kinguaattoortut sukkanerusumik ornitassaminnut apuunneqarsinnaasimapput.
Aningaasanut Inatsisip akuersissutigineqarneratigut Naalakkersuisut kiffartuussinermut isumaqatigiissutini pitsannguinernik arlalinnik qulakkeerisinnaalerput. Pitsannguinerit Qeqertarsuup Tunuani innuttaasunut iluaqutaasinnaammata nuannaarutigaara”. Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq.
AAMMA ATUARUK Soraarnerussutisiallit Arctic Umiaq Linemi akikillisaavigineqartut
2020-mi aningaasanut inatsimmi aningaasat 5 millionit koruunit immikkoortinneqarput, ilaatigut Qeqertarsuup tunuani qulimiguulimmik angallassinissamut kujataanilu qulimiguulimmik novemberimi decemberimilu immikkut ittumik angallassinermut kiisalu soraarnerussutisiaqartut siusinaarlutillu soraarnerussutisiaqartut Sarfaq Ittumut aasaanerani ilaanissaannut akikillissavigineqarnerinut atorneqarlutik.
Ilaasunik angallassinissamut kiffartuussinissamik isumaqatigiissutit ukiup naanerani atorunnaassapput.
Kiffartuussinissamut isumaqatigiissutinik 2021-minngaaniit atuuttussanik Naalakkersuisut piareersarlutik sulileruttorput.