Qujanaq annaakkatsigut
- Nassuiarsinnaanngilara taamanikkut qanoq toqqissisimatigisimanerlunga, inuiaallu inuit tatigalugit. Uummammit pisumik tatigaakka, asanninneq inussiarnissuserlu misigisara oqaasertassaqanngilaq, Alice Gard, tyskiusoq, Illoqqortoormiuni takornariartitsivimmut, Nanu Travelimut, e-mailikkut allappoq, ujaasinermi taakku aallartissimammassuk.
Mailikkut allakkamini oqaluttuarpoq, inuunermini misigisami navianarnerpaartaat pikkunarsimaqisoq, tamatumalu pinerani asanninnermik inussiarnernermillu misigisani annerpaajusoq. Immamit qaqinneqarami, piniartunit illoqarfimmiunit ikiorneqarnermini, kissalaartumik pineqarnermini, aamma nerisassanik sassaallerfigineqarnini, aallarnissamillu tungaanut sutigut tamatigut ikiorneqarnertik, puigunngisaannassallugu allappoq.
Alice Gard naggataagut allappoq, aappanilu kalaallinut qaqugukkulluunniit ikiuerusussinnaajumaarlutik.
Tunumi pisoq Kommuneqarfik Sermersuup nittartatagaani allaaserineqarpoq, takornariat 14-it anorersualeriataarnerani ajornartorsiuleriataarmata annaassiniartoqartariaqalerneq pimmat.