Qorlortorsuaq pillugu ukiup tulliani isumaqatigiisitsiniartoqassaaq

- Illuatungeriiusugut allakkatigut massakkut attaveqartarpugut, Nukissiorfiit pisortaat Svend Hardenberg oqarpoq.

- Killiffipput imaappoq, illuatungeriiusugut massakkut allakkatigut attaveqartarpugut, suliaq qanoq saqqummiunneqassanersoq pillugu. Naatsorsuutigaarpullugu ukioq 2011-p ingerlanerani suliamik aalajangiisoqarumaartoq, Nukissiorfiit pisortaat Svend Hardenberg oqarpoq.

Nukissiorfiit 225 millionit koruuninik Energikonsortiet I/S-imut akiitsoqarnersoq isumaqatigiisitsiniarnermi suliami sammineqassaaq. Tassami Nukissiorfiit Energikonsortiet I/S-imut 225 millionit koruuninik akiitsoqartoq Energikonsortiet suliassanngortitsinermi naammagittaalliuuteqarnermini 2009-mi januaarimi allappoq.

- Tamannali isumaqatiginngilarput, Nukissiorfiit pisortaat Svend Hardenberg oqarpoq, aningaasanillu akiitsoqarneq akuersaarnagu. Nukissiorfiillu naammagittaalliuut illuatungilerlugu 60-millionit koruuninik Energikonsortiet I/S-imut piumasaqarniarpoq, tassa Qorlortorsuarmi erngup nukinganik innaallagissiorfiup sananeqarnermigut amigaateqarnera tunngavigalugu.

- Aningaasat 50-60 millionit koruunit missaanniittut piumasaqaatigaagut. Uagut naatsorsuinerput naapertorlugu tassa innaallagissiorfiup amigaataasa naligivaat, Nukissiorfiit pisortaat Svend Hardenberg oqarpoq.

Illuatungeriit Københavnimi Voldgiftnævnet for bygge og anlægsvirksomhed-imi suliamik oqaasiinnakkut isumaqatigiinniarnissaat 2011-mi piffissami suli aalajangerneqanngitsumi pissasoq, Nukissiorfimmit naatsorsuutigineqarpoq. Isumaqatigiisitsiniarnerullu inernissaa suliassanngorteqqinneqarluni ingerlateqqinneqarsinnaanngilaq. Nukissiorfimmiilli suliap aalajangiivineqarnissaa neriuuteqarfigineqarpoq.

- Neriuutigaarput suliamut tunngatillugu saqqummiussagut isumaqatigineqarumaartut, Nukissiorfiit pisortaat Svend Hardenberg oqarpoq.