Qitinnermik pikialaartitsineq iluatsilluartoq OuterVision nangeqqinneqassaaq

Qiteriaatsinut assigiinngitsorpassuarnut peqataanissamut periarfissaqarpoq. Qiteriaatsit tassaapput hip hop, musical dans aamma Tango. Aamma kiinarpalerluni qitinneq, balletterneq inngernerlu misilinneqarsinnaapput. Qitinnermik pikialaartitsineq Outervision ukiormanna sammisassaqartitsilluassaaq.

Meeqqat inuusuttullu sinerissami samminiarneqarnerupput, Nuummilu inersimasut qitinnerup silarsuaanik misileraanissaminnut periarfissinneqassapput. Pikialaartitsineq aggustip 20-iani Paamiuni aallartinneqassaaq Katuamilu ilinniartunik takutitsinermik sisamanngornermi septembarip tallimaani naggaserneqassalluni.

-Outervisionip tamanoortuuneranik oqartarnerput ilumut pimoorupparput. Meeqqat angerlarsimaffianeersut tamaasa nassarlugit aggertoqarsinnaavoq, imaluunniit timersoqatigisartakkat peqatigalugit allaanerulaartumik misiliilluni, aamma ikinngutiginerpaasaq qaaqquneqarsinnaavoq, aamma ilaqutariit tamarmiullutik pikialaartitsinermut peqataasinnaapput, Siornatigut qitinnermik misileereersimanissaq piumasaqaataanngilaq, Susanne Andreasen, OuterVision 2013-mi pilersaarusiornermi pisortaasoq oqarpoq.

Ilitsersuisussat nunatsinni nunanilu avannarlerni pikkorinnerpaat ilagivaat. Alexander Montgommery-Andersen ukiut sisamat matuma siorna pikialaartitsisoqartalermalli peqataasarpoq taassumalu ukiormanna suleqatigissavai kiinarpalerluni qitittartoq Varste Berndtson, Charlotte Andreasson jazzimik qitittartoq, Henriette Olsen, hip hopimik housemillu isumaginnittoq, Robert Peary, inngertartoq ballettertartorlu inuusuttunnguaq norgemiu Kristoffer Solberg.

-Nukappiaqqat ilaat immaqa isumaqarput balletterneq niviarsiaqqanoortuusoq, niviarsiaqqallu ilaat immaqa isumaqarput Hip Hop nukappiaqqanoortuusoq, taamaattoqanngilarli! Qitinnermik timillu piginnaasaanik ilinniarusukkaanni taava tamaasa misilikkaanni pitsaaneruvoq, Susanne Andreasen nassuiaavoq.

OuterVisionip pikkorissartitsinerinut pilersaarut allaaserisap ataani takusinnaavat