Qiteqquttarnerit atorunnaariartorput
Danmarkimi innuttaasut sumi qanorlu atsigisumik kaffisortarnerannik apersuisimasoq tassaavoq kaffinik tunisassiorfissuaq Nestle.
Apersuinerup takutippaa suleqatiminnik kaffisorujuutaa qiteqquteqateqartartut 53 procentiusut. Taannalu kisitsit siornamut naleqqiulluni 5 procentimik minneruvoq, taama politiken.dk allaaserinnippoq.
Kaffisoqatigiittarnermik tunutsisut tassaapput, Politikenip allaaserinninnera naapertorlugu, ego-pausertartut tassaasut inuit kaffisoorusaajutaa qarasaasiaminni allagarsiaminnik alakkartererujoortartut internetikkulluunniit paasisassarsiorujoortartut, arsartulerillutik Facebookerujoorlutilluunniit.
Qiteqquteqartarnerup atugaajunnaariartornera suleqatigiinnermut peqqinnanngitsoq, professor Helge Søndergård, Roskilde Universitetimeersoq oqarpoq.
Suleqatigiit ataatsimoorlutik qiteqquttarnerat ajornartorsiutinik qaangiinermut iluaqutaasartutut isigaa.
- Qiteqqunnermi, kaffisorneq, tiitorneq imertornerluunniit apeqqutaanngilaq. Suleqatigiilluni ataatsimoorneq pingaarnerpaavoq. Suliaq qilamalaarlugu assigiinngitsut pillugit suleqatinik oqaloqateqartarneq peqqinnartuuvoq, suleqatigiinnermut iluaqutaalluartoq, Helge Søndergaard Hvid Politiken.dk-mut oqarpoq.