Qiperumi nuannaarneq

Kalaallit ornittagaat Qiperoq ullumi ammaanersiorneqarmat kagisuuttoqarlunilu nalliuttorsiortoqarpoq. Aammaanersionermilu inuit amerlasuut - ornittakkamik atuisut suleqatillu - ornigussimapput.

Kalaallit Illuutaanni Københavnimiittumi pisortaq, Leise Johnsen, Qiperumi suliat ataavarnerusumik ingerlanneqarsinnaalernera nuannaarutigaa. Maanna ukiunut sisamanut tulliuttunut aningaasaliisoqarpoq, siullermik ukiut ataasiakkaarlugit aningaasaliisoqartarsimagaluartoq.

- Matuneqarnissaq ernumatigerujoorunnaarlugu iluaallaqaaq. Suliallu malunniunneri takuneqarsinnaalissapput, Leise Johnsen oqarpoq.

Kalaallit danskit aningaasartuutissanut inatsisaanni

Qiperup aningaasalerneqarnissaanut sulissutiginnissimasut ilagaat Johan Lund Olsen Inuit Ataqatigiinneersoq, ammaanersiornermilu aamma taanna peqataavoq.

- Ammaqqinnera pingaaruteqartorujussuuvoq, uannuinnaanngitsoq, nunaqqatitsinulli Danmarkimi najugaqartunut tamanut. Ulluinnarni ornittagaqarneq pingaartorujussuuvoq, ingammik ajornartorsiuteqaraanni illoqarfissuarmilu nakkarfissarpassualimmi inuulluni. Isumaginninnikkut suliniutit uku pingaaruteqartut ukiuni tulliuttuni ingerlaannarsinnaanerat assut nuannaarutigaara, Johan Lund Olsen aammaloorluni Sara Olsvigimut Folketingemi taartaasoq oqarpoq.

Inuuniarnikkut ajornartorsiutillit inuusuttut Københavnimiittut Qiperumit siunissami ikiorserneqartalissapput.

- Aqqusinermi unnuisarfinnilu ornillugit ikiorserniarlugit sulinermi, suleqatigullu ikiorsiullugit pisariaqartitaanik ikiortassavagut. Siullermik paasiniassavarput sunarpiaq pisariaqartinneraat, Qiperumi aqutsisortaap aappaa Ann Dorthe Lunde oqarpoq.

Ornittakkap aqutsisortaata aappaa tassaavoq Pavia Høegh.