Danmarkimi kalaallinut suliniutit ukiuni sisamani tulliuttuni qulakkeerneqarput
Suliniutinut aningaasaliissutit ukiut tamaasa isumaqatiginniutigineqartarsimasut maanna ukiunut tulliuttunut sisamanut qulakkeerneqarput tamannalu kalaallit Folketinge-mi ilaasortatitaannit nuannaarutigineqarpoq.
- Piffissami sivisuumi folketinge-mi ilaasortaateqatigalugu ilungersutiginikuuarput ajornartorsiutip aaqqiivigineqarnissaa, tassalu suliniutinut aningaasaliissutit ataavartunngortinneqarnissaat, tamannalu pivisunngormat nuannarutigisorujussuuara,
Siumut sinnerlugu folketinge-mi ilaasortaq Doris Jakobsen taama oqarpoq.
Suliniutinut aningaasaliissutit ukiumoortumik tunniunneqarnerisigut kalaallinut Danmarkimiittunut suliniutit ukiup naanissaanut naammassanersut nalornissutigineqartarpoq.
- Ukiut arlallit ataavartumik aningaasaliineq iluaqutaassaaq suliniutinut taakkununnga, ilisimariissagamikku ukiumi tulliuttumi qanoq amerlatigisunik aningaasaliiffigineqarsimanerlutik, taamaalillutik suliniutit ammaqattaarlutillu matusaqattaassanngillat, Sara Olsvig IA sinnerlugu folketinge-mi ilaasortaq taama oqarpoq.
Danmarkimi kalaallit inuuniarnermikkut ajornartorsiuteqartut ornittagaat aamma kalaallit illutaanni kalaallinik sullissisut kiisalu København-mi Kofoed Skole aamma København-imi kalaallit ornittagaat Qiperoq ataavartunik aningaasaliisoqarneratigut ingerlaannarnissaat qulakkeerneqarput.
- Kalaallit ornittagaanni Qiperoq-mi sulisut aamma kalaallit orniguttartut nalornissutigisimavaat ini attartorneqartoq ukiumi tulliuttuni attatiinnarneqarsinnaanersoq, maannalu aningaasaliisoqarneratigut neriuutigaara orniguttarfinnik atuisut sulisullu toqqissisimanerulaarlutik misigisimassasut, tassami ornittagartut matusussaajunnarmat, IA sinnnerlugu folketinge-mi ilaasortaq Sara Olsvig oqarqpo.
Suliniutinut aningaasaliissutit ukiumut 4,4 million kr-niussassapput.
Aalborg-imi kalaallit illuanni pisortaq Jan Thrysøe suliniutinut aningasaliissutit qulakkeeneqarnerat toqqissiallaatigaa. Ukiumi tulliuttumi qanoq ingerlasoqarnissaa nalornissutigineqarsimavoq maannalu oqaluttuarisinnaanngorparput Aalborgimi kalaallit ornittagaani Tamassa-mi ukiuni arlaqartuni suliniutigineqartut ingerlaannarnissaat.
