Qinngasaarneqarneq imminornissamut qaninnerulersitsisarpoq

Atuarfimmi uumisaartittarsimagaanni ukiorpassuit qaangiukkaluarpataluunniit imminut toqunnissaq eqqarsaatigineqalersinnaasarpoq. Atugarissaarneq pillugu ilisimatusarfiup, Det Nationale Forskningscenterip, ullumi saqqummiussasaani danskit nalunaarusiaat tamanna takuneqarsinnaavoq.
apriilip 09-at 2010 08:27

25-nik ukiullit ilutigiiaat imminut toqunnissamik eqqarsaateqarsimasut, sooq imminut toqukkusussimanersut ilisimatusarfimmit misissuiffigeqqissaarneqarsimapput, atuarfimmilu qinngasaartttarsimasut taama eqqarsaateqartarsimasut paasineqarpoq. Danmarkip Radioata nittartagaani tamanna allaaserineqarpoq.

- Qinngasaartittarneq misissuinitsinni ilanngupparput, imminut toqukkusulersinnaanermut tamanna pissutaalluarsinnaasoq pasitsaakkatsigu. Taamali isumaqartigimmat tupaallaatigaarput, sukumiisumik misissuinermi aqutsisoq, Mogens Christoffersen, Danmarkip Radioata nittartagaani issuarneqarpoq.

Misissuinermi inernerit takutippaat atuarfimmi uumisaartittartut imminut toqunnissamik eqqarsaateqartut peqatiminnit uumisaartinneq ajortunit 2,8-mik amerlanerusut.

Misissuinermi aamma paasinarsivoq meeqqap annissiffissaqarnissaa pingaaruteqarluinnartoq.

- Meeraq tatigisisinnaasaminit tusarnaarneqarsinnaaguni tamanna iluaqutigisaqaa, taava uumisaartittarnini qanoq anigorsinnaassallugu paasissavaa, Mogens Christoffersen oqarpoq.

Oqaloqatigisai tassaasinnaapput angaaq imaluunniit akkaaq, sunngiffimmi ornittakkamini pisortaq imaluunniit kammalaat peqatigisaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq