Folketingimut qinersineq 2015 Qinigassanngortittut marluk arlariinni sulerusupput
Folketingimut aqagu qinersiartoruit qinigassani marluk qinigaassagunik Inatsisartuni ilaasortaanertik attatiinnarusuppaat.
Tassa Siumumeersoq Jens-Erik Kirkegaard aamma Partii Nalerarmeersoq Per Rosing-Petersen, arlariinni atuuffeqarnissamut piareeqqapput. Qinigassanngortittut sinneri taamaaliorusunngillat.
Per Rosing-Petersen KNR-ip qinersisartunik arfininngormat ataatsimiititsinerani oqarpoq, qinigaassaguni arlariinni ilaasortaaffeqarneq taamaaliornerullu suliassaqarnassusia misilikkusullugit.
Jens-Erik Kirkegaard oqarpoq, parteeqatimi folketingimi ilaasortaasimasut, Lars-Emil Johansenip aamma Doris Jakobsenip inassimagaanni arlariinnik ilaasortaaffeqaqqullugu.
Kirkegaard naapertorlugu parteeqatai isumaqarput, kalaallimut politikerimut arlariinni suliffeqarneq iluaqutaasoq. Nunatsinni pissutsinik ilisimasaqarnerunermik tamanna kinguneqassaaq, ilisimanerusallu Folketingimi atorluarsinnaasut, Jens-Erik Kirkergaard nassuiaavoq.
Kalaallit poltitikerisa arlariinnik ilaasortaaffeqarusunnerat takornartaanngilaq. Kuupik Kleist, Lars-Emil Johansen aamma Juliane Henningsen taama inissisimareernikuupput.
Arlariinnik ilaasortaaffeqarneq marloriaammik sulinermik malitseqarpoq, aammali arlariinnik akissarsiaqarfiulluni.
Kalaalleq Folketingimut ilaasortaq akileraaarut suli pernagu ukiumut 765.127 koruuninik akissarsisarpoq.
Inatsisartutnut ilaasortat akileraarut peereernagu ukiumut 487.977 koruuninik akissarsisarput.
Taakkua katikkaanni 1.253.104 koruuniupput.