Qinikkat qaffassinerpaamik akissarsiaqarusupput

Qinikkat qaffasinnerpaanik akissarsiaqartuassappat Kommunalbestyrelse februaarip 23-ani ataatsimiileruni apeqqut taanna isummerfigissagaat, allaffeqarfiup qinnutigaa. Borgmester Hermann Berthelsen isumaqarpoq, ilumut taamaasasoq:

- Taamaaliortuuaannarnikuuvugut. Tassami maani qinikkat kommunini allani qinikkanut naleqqiullutik akissarsiakinnerunissaat pissutissaqanngilaq, borgmesteri oqarpoq.

Qinikkat sulinngitsoornersiutisineq ajorput. Taamaammat suliffimminniit sivisuumik peqanngittariaqaraluaraangamilluunniit, aningaasanik amerlanerusunik pineq ajorput.

- Qinikkanuku siornatigut sulinngitsoornersiutisisarmata, akissarsiat qaffasinnikuusut, Hermann Berthelsen erseqqissaavoq.

Qinikkat akissarsiassaattut sinaakkusiussat 4,8 millioni koruuniunissaat Naalakkersuisunit aalajangersagaavoq. Aningaasalli qinikkanut 31-iusunut assigiiaamik agguaanneqarneq ajorput.

Borgmesteri akissarsiaqarnerpaavoq, qaammammut 71.000 koruunit missaat akissarsiaralugit. Tassa ukiumut 850.000 koruunit missaat. Hermann Berthelsen oqarpoq, kommuninini allani pingasuni borgmesterit aamma taamatut akissarsiaqartut.

Kommunimi ataatsimiititaliat siulittaasuisa suliassaqassusii assigiinngitsuupput. Taamaammat ataatsimiititaliat siulittaasuisa suliassaqassusii naapertorlugit akissarsiaqartinneqalissasut allaffeqarfimmit aamma inassutigineqarpoq.

Kisianni borgmesteri tamatumunnga naaggaarpoq.

- Ataatsimiititaliat aaqqqissuunneri allanngortinniarlugut isumaliutigaarput. Tassalu ataatsimiititaliat ikilissanersut amerlissanersulluunniit isummerfigisussaavarput, Hermann Berthelsen oqarpoq.