Qinigaaqqammersoq Venstremit issittoq pillugu oqaaseqartartunngortoq
Venstre issittoq pillugu oqaaseqartartussami aalajangiivoq. Qinigaaqqammersorlu Christoffer Aagaard Melson toqqarneqartoq, Ritzau allappoq.
- Tatigineqarnera tulluusimaarutigaara nuliassarlu nutaaq pissanganartoq qilanaaralugu. Pissaanilissuit soqutiginnikkaluttuinnarnerat silallu pissusiata allanngoriariartornera pissutigalugit Issittoq ukiuni kingullerni ukkatarineqaleraluttuinnarpoq.
- Issittoq pillugu nutaamik iliuusissiornissarout 2020-mi suliassani aamma pingaaruteqarpoq, oqaaseqartartunngortoq Facebookimi allappoq.
Oqaaseqartartutut atuuffik Ventremi siulittaasup tulliata, Kristian Jensenip Venstrep Folketingimi atuuffimminit tamanit illikartinneqarneranik pissuteqarpoq.
AAMMA ATUARUK Venstrep Issittoq pillugu oqaaseqartartua Kristian Jensen oqaaseqartartuujunnaarsitaasoq
Kristian Jensenip partiimini Venstremi tusarniaaqqaarnani partiit allat suleqatigineqartariaqarnerannut eqqarsaatiminik oqaaseqarsimanera illikartinneqarneranut pissutaasoq pisortatigoortumik nassuiaatigineqarpoq.
Christoffer Aagaard Melson Venstremit nunatsinnut oqaaseqartartunngortoq Issittoq pillugu aallartitami Kalaallit Nunaallu pillugu ataatsimiititialiami aamma ilaasortaalerpoq.
Christoffer Aagaard Melson 35-nik ukioqarpoq, Folketingimullu kingullermik 2019-imi juunimi qinersisoqarmat qinigaarngaarluni.
